आन्दोलनया नापनापं वार्ता नं यायेमाः

थःपिंसं बियातःगु अल्टिमेटम पूवनेवं हे माओवादीं म्हिगःनिसें थःपिनि आन्दोलन शुरु याःगु दु। आन्दोलनया न्हापांगु न्हि कथं म्हिगः देय्न्यंकं मसाल जुलुस पिकायेगु ज्या जुल। म्हिगः पिहां वःगु मसाल जुलुस अतिकं तःधं। वास्तवय् माओवादीं थुलि विशाल जुलुस पिकयाः थःपिं आन्दोलनया लागिं धाथें गम्भीर खः धकाः क्यना बिउगु दु। येँय् जक उमिगु जुलुस न्याथासं पिहां वःगु खः। येँय् आः तक थुलि तःधंगु व विशाल मसाल जुलुस पिहां हे मवःनि धाःसां जिउ। माओवादीया थ्व आन्दोलन आः मेमेगु नं थीथी ज्याझ्वःत यानाः न्ह्याः वनीगु ग्वसाः दयेका तःगु दुसा उकी दुनेया खास यानाः राजधानी नाकाबन्दी यायेगु व विमानस्थल तकं बन्द यायेगु ज्याझ्वःया खँ न्यनाः सर्वसाधारण त्रसित जुयाच्वंगु दु। धायेत ला माओवादीं थःपिनि आन्दोलन शान्तिपूर्ण हे जुइ धकाः धयाच्वंगु दु। तर मैदानय् कुहां वनीबलय् च्वय् च्वंपिं नेतातय्सं धाः थें जुइगु सम्भावना धाःसा म्हो जक दु ।

उखे माओवादीं आन्दोलन घोषणा यायेवं सत्तारुढ पार्टीत एमाले व कांग्रेसं वयात आन्दोलन दिकाः वार्ताय् वा धकाः इनाप याःगु दु। कांग्रेस व एमालें याःगु थ्व आह्वानयात नं माओवादीं आत्मसात धाःसा यायेमाः। वार्ताय् वा धाःगुलिं आन्दोलनया नापनापं वार्ता नं यानाच्वंसा व तसकं बांलाइगु जक मखु उकिं आन्दोलन हे याये म्वायेक माग पूवनीगु सम्भावना नं दयेफु। उकिं माओवादीं वार्ता त्वःते मजिउ। अले वार्ताय् सःतीपिंसं होम वर्क मयासे वार्ताया टेबुलय् च्वनाः माओवादीयात अलमल यायेगु दाउ जक म्हितेगु नं स्वये मजिउ। शान्ति कायम यायेगु राज्यया मू जिम्मेवारी खः धइगु ल्वःमंके मजिउ ।

More Stories Like this