फुर्सदया कला

नेपाःया मौलिक चचा प्याखं लगायत थीथी जातीय प्याखं व बाजंया संवर्द्धन यानाः विश्वन्यंकं प्रचार याना वनेगु ताः तयाः नीस्वनातःगु छगू सांस्कृतिक संस्था खः वज्र कला कुञ्ज। थ्वं थःगु पुचःया कलाकारतपाखें नेपाःया थीथी थासय् जक मखु देशविदेशय् तकं नेपाःया मौलिक कला न्ह्यब्वयेगु ज्या याना वयाच्वंगु दुसा थुकियात अझ विस्तार याना यंकेगु लागिं नियमित रुपं परम्परागत प्याखं हुलीपिं कलाकारत नं तयार यायेगु ज्या न्ह्याका- च्वंगु दु। थ्वहे झ्वलय् कला कुञ्जपाखें वंगु लत्या तक मोहनि व स्वन्ति विदाय् छेँय् तुं फुर्सदया ई छ्यानाच्वंपिं विद्यार्थी मस्तय् लागिं हुलाप्याखं, बाजं आदिया प्रशिक्षण सञ्चालन याःगु खः। येँ मनपाया ग्वाहालिइ कला कुञ्जया थःगु हे ज्याकुथी सुथय् बहनी यानाः थीथी शिफ्टय् सञ्चालन याःगु उगु निःशुल्क प्रशिक्षण शिविरय् ८४ म्ह मस्तय्सं ब्वति काःगु खः। ब्वति काःपिं मस्तय्त थीथी कला स्यनेधुंकाः उमिसं स्यना काःगु कलायात वंगु शनिवाः छगू सार्वजनिक ज्याझ्वः हे यासें पित बीगु ज्या नं कला कुञ्जपाखें यात ।

येँया मरुइ च्वंगु महाद्यः पार्वती देगःया क्वय् च्वंगु दबुली उगु सांस्कृतिक ब्वज्या जूगु खः ।

संस्कृति मन्त्री डा. मिनेन्द्र रिजाल मू पाहां कथं झाःगु उगु सांस्कृतिक ब्वज्याय् प्रशिक्षणय् सहभागी मस्तय्सं कुमारी प्याखं, मञ्जुश्री, पञ्चबुद्ध, वज्रयोगिनी, वा माया वा आदि बोलय् हुला प्याखं न्ह्यब्वःगु खः ।

प्रशिक्षण शिविरय् ८४ म्ह मस्तय्सं ब्वति काःगु खः। मू पाहां मन्त्री रिजालं प्रशिक्षणय् ब्वति काःपिं मस्तय्त दसिपौ नं लःल्हानादिल। लिसें वय्कलं थज्याःगु सांस्कृतिक ज्याझ्वःपाखें नेपाःया मौलिक संस्कृति ल्यंकेगु ज्याय् तःधंगु तिबः जुइगु बिचाः नं प्वंकादिल ।

वज्र कला कुञ्जया संस्थापनक नायः व चचा गुरु चन्द्रमान मुनिकार नापं थीथी प्रशिक्षकपिंसं उगु प्रशिक्षण बियादीगु खः ।

गुरु मुनिकारया कथं चचा प्याखं हुलेगु धइगु केवल प्याखं जक हुलेगु मखु, थुकिं मस्तय्त मानसिक व शारीरिक विकास यायेगु अवसर नं बियाच्वंगु दइ ।

वय्कलं थज्याःगु प्रशिक्षण थीथी स्कूलय् वनाः नं सञ्चालन याना वयाच्वंगु दु ।

More Stories Like this