बांलाःगु समाचार बियादिसँ

सम्पादकजु,

छिकपिनिगु पत्रिकाय् थौंकन्हय् पिहां वइगु समाचार वहे पुलांगु राजनीतिक 'न्युजु' व 'भ्युजु' जक जुयाच्वंगु दु । थ्व नं अप्वः यानाः न्ह्याबलें सरकारयात आलोचना यानातःगु बन्द आन्दोलन व अज्याःगुयात हे जक थाय् बियातःगु दइ । छगू कथं वा मेगु कथं छिकिपंसं थज्याःगु हे ज्यायात जक अप्वः प्रोत्साहन बियाच्वंगु खनेदु । छिकपिनिगु जःखः थ्व बाहेक मेमेगु नं आपालं घटनात जुयाच्वंगु दु गथे कि विकास निर्माण वा मेमेगु । थज्याःगु ज्याया लागिं नेपाली जनतायात विश्वं म्हसी तर छिकिपंसं लिपा जक म्हसियाच्वनी । छिकिपंसं नेपाली जनतायात आनन्द वइगु छुं खँ नं कनेमाःगु आवश्यकता दु । व कनीपिं धईपं छिकिपं थेंज्याःपिं पत्रिकात हे खः । आः नकतिनि हे कोटेश्वरं सूर्यविनायक तकया लँ तब्या यायेगु कथंया निर्माण ज्या न्ह्यानाच्वन धाःगु खँ जिं न्यना । तर छिकपिनिगु पत्रिकाय् थुकिया बारे छगू कालमया चीधंगु समाचार छकू जक पिदन । थुकिया बारे खास हे समाचार मच्वःगुलिं थुखेपाखे छिकपिनिगु ध्यान हे मवं धइथें जितः तायाच्वंगु दु । कृपया थज्याःगु घटनायात तःधंगु समाचार दयेकाः पिकया बियादिसँ । थज्याःगु समाचार पिहां वल धाःसा तिनि नेपालं पिनेयापिंमनूतय्सं नं सी आखिर नेपालय् छु जुयाच्वंगु व छु बांलाःगु ज्या न्ह्यानाच्वंगु दु धइगु खँ । तर थज्याःगु खँ झीथाय् अथें वइ अथें वनीगु जुयाच्वन । उकिं पुलांगु हे समाचार बीगु ढंगयात त्वःताः न्हूगु कथं मनूयात उत्साहित याइगु ढंगया समाचार बीत इनाप यानाच्वना ।

- मुराज ।
sheymuraj@hotmail.com

More Stories Like this