एनआरएनया माग संवोधन यायेमाः

डी. आर खड्गी

भारतय् भारतीय जनता पार्टीं सरकार चले यानाच्वंगु इलय् प्रधानमन्त्री अटल विहारी बाजपायीं गैर आवासीय भारतीय नागरिक (एनआरआई)यात भारतय् लगानी यायेत इनाप यात। एन.आर.आई.पाखें नं देय्या आर्थिक सुधार यायेगु लागि लगानी पुँजी यायेगु उत्साह क्यन। भारत सरकारं कानूनय् तकं सुधार हयाः एन.आर.आई.यात लगानी बृद्धि याकेगु लागिं वातावरण तयार यानाबिल। नेपाःया नेतातय्सं थें म्हुतुं ठिक ज्यां बेठिक यायेगु भारतया नेतातय्सं मस्वः। झीगु देय्या नेतातय्गु स्वभाव धाःसा अजिव खः छाय्धाःसां उपिं नयेथाय् मिले जुयाच्वनी ज्या यायेथाय् मिले जुइ मखु। थनया नेतातय्सं एनआरएन (गैर आवासीय नेपाली) तय्त पुँजी लगानी यानाः आर्थिक सुधार याये माल धकाः धायेगु मयाः। स्वयम् एनआरएनपाखें देय्या आर्थिक सुधार यायेगु इच्छा ज्वनाः लगानी यायेत तयार जुयाच्वंगु खः। एनआरएनपाखें पुँजी लगानी यायेगु इच्छा जागृत जुयाच्वंगुलिं थःपिंसं हे गतिविधि न्ह्याका वयाच्वंगु नं खः। तर देय्या लागि दुर्भाग्य थ्व जुयाच्वन कि थनया नेतातय्के देय् विकास यायेगु छुं हे भिजन मदु, खालि घुस नयेगु, कमिशन नयेगु विदेशीयाके ध्यबा फ्वनेगु बाहेक मेगु छुं हे ज्या मदु। नेतातय् खराब प्रकृतिं यानाः अन्तर्राष्ट्रिय ख्यलय् नेपाःया बेइज्जती जुयाच्वंगु खः। थनया नेतातय्सं बेइज्जती यानाच्वंगुलिं एनआरएनपाखें नेपाः विकास यानाः अन्तर्राष्ट्रिय ख्यलय् जुयाच्वंगु बदनाम न्हंका छ्वयेगु बिचा यानाच्वंगु खः। एनआरएनया पदाधिकारीतय्सं थ्व खँ नं मसिउगु मखु कि खँसुवाः (खँ जक ल्हानाः नयाच्वंपिं) नेतातय्सं विदेशीयाके त्यासा कयाः विदेशीया घातक शर्त स्वीकार यानाः देय्यात गुलि स्यंकाच्वंगु दु। देय् यक्व बर्बाद जुया वःगुलिं एनआरएन सक्रिय जुयाः उद्योग, व्यापार, यातायात, कृषि ख्यलय् पुँजी लगानी यानाः देय्या अवस्था भिंकेगु इच्छा तयाः ज्या यायेत स्वयाच्वंपिं खः ।

असोज २७ गते शान्त समृद्धि नेपाः झीगु साझा सवालया नारा बियाः एनआरएन या अधिवेशन शुरु जुल। अधिवेशनय् ५२ देशय् बसोबास यानाच्वंपिं ५०० प्रतिनिधि सहभागी जुयाच्वंगु खँ आयोजकतय्सं स्पष्ट यात। एनआरएनया पुलांम्ह अध्यक्ष उपेन्द्र महतों गोष्ठीइ भाषण बीगु झ्वलय् महत्वपूर्ण खँत धाल। नेपाःया आर्थिक स्थिति कमजोर जुयाच्वंगु दु। थ्व समस्या समाधान यायेत एनआरएन तयार जुयाच्वनागु दु धाल। महतों थ्व नं धाल कि विदेशी दातृ निकायया आशय च्वनेगु ठिक मजू। यदि झी सक्षम सबल जुल धाःसा विदेशी दातृ निकाययात झीसं चाकरी याये म्वायेक इपिं हे वयेगु शुरु याइ। महतों थ्व खँय् बः बिल कि एनआरएनयात दोहोरो नागरिकताया आवश्यकता दु। दोहोरो नागरिकताया अर्थ थ्व मखु कि जिपिं नेपाःया राजनीतिइ कुहां वयेत स्वयाच्वना, थ्व खालि आर्थिक व सामाजिक ख्यलय् ज्या यायेत सहज वातावरणया लागिं जक माःगु खः धाल। एनआरएनया सभा उलेज्या यायेगु झ्वलय् राष्ट्रपति रामवरण यादवं भाषण बिसें धाल - एनआरएनतय्सं पूर्वाधार निर्माण, यातायात, जलश्रोत, वातावरण न्यूनीकरणया ख्यलय् लगानी याना बी माल। राष्ट्रपतिं थ्व खँय् नं बः बिल, एनआरएनया सीप, पुँजी व प्रविधिया शक्तियात ठीक ढंगं उपभोग यानाः देय् विकास यानाः क्यने माल। एनआरएन या गोष्ठीइ परराष्ट्र मन्त्री सुजाता कोइरालां दोहोरो नागरिकता बीगु विषयय् उच्च तहलय् छलफल जुयाच्वंगु दु धकाः जानकारी बिल। कोइरालां थ्व नं धाल, २०६४ सालय् एनआरएन सम्बन्धी ऐन व २०६६ सालया नियमावली गैर आवासीय नेपालीयात छेँ, बुँ न्यायेगु मीगु व बैंक खाता खोले यायेगु तक अधिकार बियातःगु दु। अथे जूगुलिं एनआरएनपाखें पुँजी लगानी यायेत ग्यायेमाःगु आवश्यकता मदु ।

नेपाःया उच्च अधिकारीतय्गु भाषण व खँ न्यनेबलय् छु संकेत क्यनाच्वंगु दु धाःसा एनआरएनयात ज्या याकेगु वातावरण दयेका बीत उपिं तयार मदु। यदि नेतात धाथें सकारात्मक सोच दुपिं व विकासप्रेमी खःसा एनआरएनतय्त भाषण जक बियाः ठिक यायेत स्वइ मखु ज्यां हे यानाः क्यना बी। एनआरएनया सकारात्मक मागयात पूरा यानाः ज्या यायेगु वातावरण दयेकाः नं बीगु खइ। गथे भारतया नेतात छपलाः न्ह्यःने बढे जुयाः एनआरआईया जायज मागत पुरा यानाबिल ।

एनआरएन सम्मेलनया असोज २७ गते जूगु सभां न्हूम्ह सभापति देवमान हिराचनयात सर्वसम्मतं ल्यायेगु यात। हिराचन सभापति जुइसातकि महत्वपूर्ण खँत न्ववानाः नेपाली जनताया नुगलय् आशा व भरोसाया मत च्याकेगु कुतः यात। अथे धयागु थःपिनिगु पुँजी लगानी नं सामूहिक रुपं यानाः नेपाःया कृषि क्षेत्र व उद्योगय् ध्यान बियाः देय्या आर्थिक सुधार यायेगु हे थःपिनि मू उद्देश्य खः धइगु बिचाः प्वंकल। नेपाःयात विश्वय् पहिचान कायम याकेया लागिं बांलाःगु संस्कृतिया प्रचार यानाः पर्यटन उद्योग धिसिलाकेगु खँ, नेपाःया उत्पादन वस्तुयात विश्वया बजारय् प्रचार यानाः उद्यमीतय्त हौसला बढे यायेगु हे एनआरएनया लक्ष्य खः धकाः स्पष्ट यात। थुलि जक मखु विशेष यानाः नेपाःया श्रमिकतय्त समस्या व दुःख जुइगु खाडी राष्ट्र व मलेशिया खः। समस्या जुइगु कारण पत्ता लगे यानाः समाधान यायेगुली नं एनआरएनपाखें पहल यायेगु आश्वासन बिल। वास्तवय् थ्व फुक्क समस्याया समाधान यायेगुली सरकारं जिम्मेवारी काये माःगु खः। तर सकारात्मक सोच दुपिं नेतात सत्ताय् मदुगुलिं यानाः समस्या प्रति बेवास्ता यानाच्वंगु दु। एनआरएनपाखें आः नं बैक, संचार, शिक्षा व स्वास्थ्य क्षेत्रय् पुँजी लगानी यानाच्वंगु दु। थ्व क्षेत्रय् लगानी जुयाच्वंसां देय्यात कम व लगानीकर्तायात अप्वः फाइदा जुयाच्वंगु खनेदु। एनआरएनया उद्देश्य लबः दइगु ज्या सिबें सेवा मुलक व उत्पादनमुलक थासय् लगानी यानाः देय् व जनतायात अप्वः राहत बीगु खः। सभापति देवमान हिराचनं स्पष्ट रुपं नेपाः सरकारयाके स्वता चीज माग यात, छता दोहोरो नागरिकता, निता दोहोरो कर खारेजी व स्वता, विदेशी लगानीकर्तातय्त गुलि सुविधा बियाच्वंगु खः उलि हे थःपिंत नं बी माल। एनआरएनया माग प्रति सरकारं गुलि ध्यान बी, व स्वयेगु ल्यं हे दनि ।

More Stories Like this