तुच्चां विभाजन जुइत्यंगु एमाले

सत्तारुढ पार्टी नेकपा (एमाले) पाखें न्हूदँया लसताय् याःगु निगू तुच्चा ज्याझ्वः नकतिनि सम्पन्न जुल। छगू शुक्रवाः व छगू शनिवाः। शुक्रवाः उपत्यका समन्वय कमिटीपाखें उगु ज्याझ्वः याःगु खःसा शनिवाः येँ जिल्ला कमिटीपाखें गठित न्हूदँ समारोह समितिं याःगु खः। खास ला येँय् संस्थापन पक्षं विघटन यायेधुंकूगु जिल्ला कमिटी व वयां लिपा गठन याःगु जिल्ला कमिटीं अलग अलग हे तुच्चा यायेगु तयारी यायेधुंकूगु खः। तर पार्टीं निगुलिं पुचःयात तुच्चा याये मते बरु उकिया पलेसा निगुलिं पुचः मिले जुयाः उपत्यका समन्वय कमिटीपाखें तुच्चा या धकाः निर्देशन बिउगु खः। तर विघटन जुइधुंकल धाःगु जिल्ला कमिटीपाखें ज्याझ्वः लित मकायेगु धायेवं थथे निगू तुच्चा ज्याझ्वः जूवंगु खः।
थ्व ज्यां यानाः छगू ला पार्टीया निर्देशन विघटन जुइधुंकल धाःसा कमिटीं पालना मयाःगु खने दत, मेगु थ्व निगू बिस्कं ज्याझ्वलं एमाले दुनेया विवादयात झन् स्पष्ट रुपं हे पिने पिकया बिउगु नं खने दत। निगू पुचःपाखें बिस्कं ज्याझ्वः याःगुलिं थुकिं हे गनं पार्टी दुने विभाजनया ध्वः जकं किया बीगु मखु ला धइगु ग्याःचिकु नं पिहां वःगु दु। उकुन्हु तक पार्टीया शीर्ष नेतातय् दथुइ जक सीमित जुयाच्वंगु थ्व विवाद थुगु तुच्चा ज्याझ्वःया नापनापं क्वय्या कार्यकर्ता तहलय् तकं विस्तार जूवंगु दु। थुकियात इलय् हे पने मफुत धाःसा अन्ततः हानं छक्वः एमाले विभाजनया दुर्घटना जुइगु तःधंगु खतरा दु। थौंया इलय् एमालेया विभाजन थुकिया नेतातय् लागिं आत्मघाती पलाः जुइगु ला द हे दु, लिसें देश व देशय् जुइत्यंगु युगान्तकारी हिउपाःया लागिं नं छगू धक्का जुइगु खँय् विवाद मदु ।

More Stories Like this