कांग्रेस महासमिति न्ह्यात
सभापति कोइराला झण्डै मवयेत्यंगु
आन्दोलन दिकेत प्रचण्डयात इनाप / सुजाता प्रकरण तच्वयेक ल्ह्वनीगु
येँ (सन्ध्या टाइम्स)/नेपाली कांग्रेसया सभापति गिरिजाप्रसाद कोइरालां माओवादी अध्यक्ष पुष्प कमल दाहाल 'प्रचण्ड'यात आन्दोलनया फुक्कं ज्याझ्वः दिकाः वार्ताय् वयेत आह्वान यानादीगु दु ।
थनिंनिसें प्रज्ञा भवनय् न्ह्याःगु कांग्रेस महासमितिया बैठकय् न्ववायेगु झ्वलय् वय्कलं सहमति व सहकार्यया विकल्प मदु धासें माओवादी सहमतिइ वइगु विश्वास नं प्वंकादिल।
वय्कलं उच्चस्तरीय राजनीतिक संयन्त्र दयेकेधुंकाः फुक्कं गतिरोध अन्त्य जुइ धासें प्रचण्डं थः उगु संयन्त्रय् च्वनेगु प्रतिवद्धता प्वंकादीगुलिं सहमतिइ वइगु विश्वास प्वंकादीगु खः ।
सभापति कोइरालां महासमितिया बैठकपाखें यायेत्यंगु पार्टी सभापतिया अधिकार क्वपालेगु ज्या याये मजिउ धासें पार्टीइ एकता कायम यायेत इनाप यानादिल ।
चिकित्सक सहित बैठकय् ब्वति काः झाःम्ह सभापति कोइराला थःगु संवोधन क्वचायेवं लिहां वनाछ्वःगु खः। पार्टी सूत्रं बिउगु जानकारी कथं वय्कः थौंया बैठकय् मवयेगु मनःस्थिति दयेकाः छेँय् तुं च्वनाच्वंगु खः। कार्यकर्ताया तःधंगु आग्रह लिपा अन्तिम इलय् जक वय्कः प्रज्ञा भवन थ्यंकः झाःगु खः। सभापति कोइरालां महाधिवेशन नं याकनं हे वयेत्यंगुलिं महासमितिया थ्व बैठक सःतेम्वाः धकाः दवाव बिया वयाच्वंगु खः ।
कांग्रेस महासमितिया बैठकय् महामन्त्री विमलेन्द्र निधिं प्रतिवेदन न्ह्यब्वइगु ज्याझ्वः दुसा कृष्णप्रसाद सिटौलां विधान संशोधन प्रस्ताव व चक्रप्रसाद बास्तोलां राज्य पुनर्संरचना बारे प्रस्ताव न्ह्यब्वइगु ज्याझ्वः दु ।
विधान संशोधन व राज्य पुनर्संरचनायात कयाः कांग्रेस दुने विवाद ब्वलनेवं थुकिया बारे महासमितिं निर्णय यायेगु धकाः केन्द्रीय समितिं निर्णय याःगु खः ।
थ्वहे झ्वलय् थौं बैठक जुयाच्वंगु थासय् नेपाल ट्रेड युनियन कांग्रेसं धर्ना बिउगु दु। कांग्रेस एकीकरण लिपा जुयाच्वंगु थ्व न्हापांगु महासमिति बैठक खः ।
महासमिति बैठकय् सभापति कोइरालाया म्ह्याय् सुजाता कोइरालायात उपप्रधानमन्त्री दयेकूगु खँयात विशेष मुद्दा कथं ल्ह्वनेगु तयारी नं कार्यकर्तातय्सं यानाच्वंगु खँ सीदु दु। बैठक कंस सिधयेकेगु ग्वसाः दु ।
