प्रहरीं निगू करोड लुटे यात

लुटे याःपिं ज्वन तर लुटे जूम्ह बेपत्ता

लुटे जूगु डलर अवैध जूगु आशंका / प्रहरीया कारवाही झन शंकास्पद

येँ (सन्ध्या टाइम्स)/प्रहरी धइपिं जनतायात लुटपाटपाखें बचे याइपिं खः, तर प्रहरीं हे जनतायात लुटपाट शुरु यात धाःसा यायेगु छु? वंगु लक्ष्मीपुजा कुन्हु येँया स्वयम्भुइ छम्ह सर्वसाधारण मनूयात प्रहरीं हे लुटपाट याःगु दु। व नं सामान्य लुटपाट मखु, करिब निगूत्या करोड तका बराबरया अमेरिकी डलर लुटपाट ।

विज्ञ सूत्रतय्सं बिउगु जानकारी कथं वकुन्हु बहनी डल्लुइ च्वंम्ह सोनाम नांया छम्ह मनू स्वंगू लाख डलर दां ज्वनाः वयाच्वंगु जुयाच्वन। वं अथे ध्यबा ज्वना वःगु खँ सीकाः स्वयम्भुया निम्ह प्रहरी व सोनामया हे पुलांम्ह ड्राइभरं जानाः पेस्तोल क्यँसें लुटे याःगु खः ।

सर्वसाधारण मनूतय् ध्यबा लुटे याःगु खँ सीकाः प्रहरीं निम्हं लुटेरा प्रहरीत हवल्दार मकर श्रेष्ठ व जवान रामहरि सुवेदीयात ज्वनाः कारवाही न्ह्याकाच्वंगु दु ।

तर लुटेरातय्त कारवाही याःसां ध्यबा लुटे जूम्ह सोनामं धाःसा आः तक थ्व घटनाया बारे गनं नं उजुरी मयाःनि। वं ज्वना वःगु थ्व ध्यबा हे अबैध जूगु कारणं गनं नं उजुरी मयाःगु जुइफु धाःगु दु ।

थ्व घटनायात कयाः महानगरीय प्रहरी आयुक्तपाखें कारवाही प्रक्रिया न्ह्यानाच्वंगु खँ सूत्रं धाःगु दु। थुकी ल्हाः दुपिं निम्ह प्रहरी व सोनामया पुलांम्ह ड्राइभरयात नं आयुक्तं हे ज्वनातःगु दु। तर प्रहरी संरचनाय् आयुक्त थम्हं हे सुयातं कारवाही याये मदु। कारवाहीया ज्या गुगु लागाय् अपराध जूगु खः वहे वृत्तया प्रहरी चौकीं यायेमाः। अथे छुं मयासे आयुक्त थःहे कारवाहीया ज्याय् लगे जुयाच्वंगुलिं थ्व घटना अझ रहस्यमय जूगु खँ नं सूत्रं धाःगु दु। आयुक्तया ज्याकू लानिपुखुली कुनेगु हिरासत मदुसां उमित आयुक्तया हे क्वथाय् कुनातःगु खँ नं सूत्रं धाःगु दु ।

उखे लुटे याःपिं निम्हं प्रहरीयात ज्वनातःसां लुटे जूम्ह व्यापारी सोनाम धाःसा बेपत्ता जूगु दु। अवैध ध्यबाया पोले खुले जुल कि थः नं लाइ धकाः सोनाम बिसिउँ वंगु अनुमान सूत्रं याःगु दु ।

सूत्रया कथं सोनामं ज्वना वःगु थ्व अवैध डलर ठमेलया पोताला गेष्ट हाउसलिसे स्वापू दुगु ध्यबा खः। लुमंकेबहः जू, पोताला गेष्ट हाउसं ज्वना वःगु द्वलंद्वः डलर वंगु खुलाया दुने येँया बुरांख्यः व ज्याथाय् नं पेस्तोल क्यनाः फिल्मी शैलीं लुटे याना यंकूगु खः ।