पर्यटनया न्हूगु कुलां स्काई डाइभिङ

नेपाःया सगरमाथा लागां आः नकतिनि स्काई डाइभिङ यानाः विश्व कीर्तिमान कायम याःगु समाचार वःगु दु। हिमालय लागाय् जुइगु न्ह्यइपुगु व ग्यानापुगु कासात मध्ये स्काई डाइभिङ नं छगू खः। नेपालय् आः नकतिनि हे जक थुकिया आरम्भ जूगु दु। सर्गतय् सतकं च्वय् थ्यंक हेलिकप्टर ब्वयेकाः अनं तिंन्हुया वयेगु थ्व कासा गुलि जोखिमपूर्ण जू उलि हे रोमाञ्चक नं जू। सर्गतय् याकःचा ब्वयाः सम्पूर्ण हिमाली क्षेत्रयात थःगु मिखां स्वयेगु थ्व ति स्वर्गीय आनन्द शायद हे जक मेगु दइ। यदि नेपालय् थुकियात व्यवसायिक रुप बियाः न्ह्याके फत धाःसा थुकिं नेपाःया पर्यटन उद्योगया मेगु छगू कुलां चायेका बीगु निश्चित दु। नेपाःया पर्यटन व्यवसायं थ्व ख्यःयात आः तक गबलें ध्यान मबिउनि ।

हानं न्यायेकेत्यंगु पर्यटन दँ २०११ न्ह्यःने वयाच्वंगु दु। थुकी नेपालं आपालं पर्यटक नेपाः सालेगु तयारी यानाच्वंगु दु। वःपिं पर्यटकतय्त नेपाः धइगु गबलें ल्वःममनी कथंया अनुभूति याका छ्वये फत धाःसा वहे थ्व पर्यटन दँया उपलब्धी जुइ। नेपालय् पर्यटक सालीगु निता हे जक विषय दु - प्रकृति व संस्कृति। थ्व निता विषययात थीथी आयामं प्रवर्द्धन याना यंकेफत धाःसा उकिं पर्यटक सालाः देय्या अर्थतन्त्र क्वातुका बीगु निश्चित दु। स्काई डाइभिङयात अज्याःगु हे छगू न्हूगु आयामया रुपय् कायेफु। थुकियात निरन्तरता बीगु लागिं सम्बद्ध व्यवसायीतय्सं मदिक्क कुतः याना च्वनेमाःगु दुसा राज्यपाखें ज्या याइपिंत माक्व हःपाः नं बियाच्वनेमाःगु दु। पर्यटन उद्योग नेपाःया दकलय् बांलाःगु आर्थिक गतिविधि जुइगु खँयात झीसं ल्वःमंके मजिउ, उकिं थुकिया निरन्तर खोज जुया हे च्वनेमाः ।

More Stories Like this