माओवादीं घोषणा याःगु संघर्ष

थःपिनि मागयात सरकार व सत्तारुढ पार्टीतय्सं संवोधन मयाः धासें एनेकपा (माओवादीं) थ्वहे कार्तिक १५ गतेनिसें आन्दोलन न्ह्याकेगु घोषणा याःगु दु। उखे माओवादीं आन्दोलन यायेगु धायेसातकि उगु आन्दोलनयात थःपिंसं सामना यायेगु धकाः सत्तारुढ पार्टीतय्सं मेगु 'घोषणा' यानाः देशयात धाथें हे मुठभेडया स्थितिइ यंकेत्यंगु दु ।

माओवादीं आन्दोलन घोषणा याःसां ज्याझ्वः धाःसा कार्तिक १५ लिपा जक न्ह्याकेगु धाःगु दु। उकिं अझ नं वार्ता यानाः छुं सहमति पिकासें माओवादीयात आन्दोलनय् मछ्वयेगु खःसा ई दनि। थ्व ईयात सदुपयोग यायेमाः। तर अथे मयासे सत्तारुढ राजनीतिक पार्टीतय्सं माओवादीयात ह्ययेकेगु पलेसा उमिसं याइगु आन्दोलनया सामना यायेगु धकाः निर्णय याःगु तःधंगु दुर्भाग्य खः। थुकिं निगू पुचःयात आः मुठभेदया स्थितिइ यंका बीगु निश्चित दु। सत्तारुढ दलतय्गु ज्या धइगु न्ह्याथे यानाः नं देशय् अमन कायम याना तयेगु खः। विद्रोही पुचःतय्सं थीथी कारण क्यनाः देशय् आन्दोलन, विद्रोह यायेफु। राज्यं उमिसं न्ह्यागु याःसां उकिया सामना यायेगु व उमित बल छ्यलाः सिधयेका छ्वयेगु धकाः बिचाः यात धाःसा उकिया लिच्वः छु जुइ धइगु खँ संसारया आपालं देय्या उदाहरणं झीत क्यनाच्वंगु दु। उकिसनं थौंकन्हय् नेपाःया अवस्था अतिकं संवेदनशील दु। राज्य न्हूगु संरचनाय् वनेत्यंगु दु। न्हूगु संविधान वयेत्यंगु दु। थ्व घडी अतिकं संयम जुयाः बुद्धिमतापूर्ण पलाः छीमाःगु दु। उकिं आन्दोलन याइपिं व उकिया सामना याये धकाः सुर कसे जुइपिं निखलःसिनं ख्वाउँगु दिमागं बिचाः यानाः जक पलाः न्ह्याकेमाःगु आवश्यकता थौं जुयाच्वंगु दु ।

More Stories Like this