फुसा सरकार क्वःथ : प्रम
बैठकपतिकं माओवादीया खँ पाःगुलिं प्रम हैरान
बजेट हयेगु मेगु लँपु मालाच्वन / सदन अवरुद्ध बारे थौं सहलह
येँ (सन्ध्या टाइम्स)/माओवादीं फुसा सदनं हे बहुमत खाकाः सरकार गठन या धकाः प्रधानमन्त्री माधव नेपालं हाथ्या बियादीगु दु ।
थौं सुथय् एमाले संसदीय दलया ज्याकुथी सभासद्तय्त संवोधन यासें वय्कलं उगु हाथ्या बियादीगु खः।
माओवादीयात सहमतिइ हयेगु निंतिं अन्तिम तकं कुतः जुइ धासें वय्कलं माओवादीं बैठकै पिच्छे फरक फरक माग यानाच्वंगुलिं उमिगु वास्तविक माग छु खः धइगु खँय् हे थःपिं अलमल जुयाच्वंगु खँ नं वय्कलं कनादिल।
माओवादीं सतकं हे सरकार कब्जा यायेत स्वयाच्वंगु द्वपं बिसें वय्कलं मेगु दलतय्सं थःपिनि न्ह्यःने आत्मसमर्पण या धइगु माओवादीया चाहना खने दु गुगु सम्भव मदु धकाः नं स्पष्ट यानादिल ।
माओवादी अध्यक्ष प्रचण्डलिसे खँ ल्हायेगु झ्वलय् सहमतिइ हे न्ह्याः वनेगु खँय् सहमत जूसां सहमति धाःसा कायम जुइ फयाच्वंगु खँ नं वय्कलं धयादीगु दु ।
वय्कलं राष्ट्रपतियात द्वपं बी कथंया गुगुं नं ज्या मयायेगु अडान नं अन प्वंकादिल। 'यदि माओवादी सहमत जुल धाःसा संविधान संशोधन यानाः जूसां माओवादीया माग पूवंकेत तयार दु,' प्रम नेपालं धयादिल ।
वय्कलं संविधान दयेके न्ह्यः हे माओवादी सेना समायोजन यायेगु खँ कनादिसें दलित, जनजाति व मिस्तय्त प्राथमिकता बीगु जुइ धयादिल ।
सिंहदरवारस्थित एमाले संसदीय दलया ज्याकुथी न्ह्यानाच्वंगु बैठकय् राजनीतिक गतिरोध, माओवादीं यानाच्वंगु सदन अवरोध व बजेट पारित यायेगु बारे सहलह जुयाच्वंगु दु ।
थ्वहे झ्वलय् थौं मन्त्रिपरिषद्या नं बैठक च्वनेत्यंगु दु। थौंया बैठकय् नं माओवादीं यानाच्वंगु सदन अवरोध व बजेट पारित याकेत नालेमाःगु वैकल्पिक लँपुया बारे सहलह जुइ धाःगु दु ।
अथे हे प्रमया चीन भ्रमण, प्रहरी बढुवा आदि बारे सहलह जुइगु खँ नं धाःगु दु। मन्त्रिपरिषद्या बैठक न्ह्यः मन्त्रिपरिषदया विधेयक समितिया बैठक नं च्वनीगु खँ धाःगु दु ।
