आजुद्यःया न्ह्यःने यःसिं

मधु श्रेष्ठ

झी नेपाःमितय्गु दकलय् ताःहाकःगु नखः मोहनि खः। मोहनिया दकलय् लिपांगु न्हि कौलाथ्व पुन्हि कुन्हु नखः क्वचाइगु खः। थुबलय् श्री महालक्ष्मीया पुजा याइगु नं खनेदु। श्री महालक्ष्मी थुकुन्हु झी च्वंच्वनागु मर्त्यमन्दल स्वः बिज्याइ धइगु जन विश्वास दु ।

थ्व दिं कुन्हु येँया वंघलय् च्वंम्ह आजुद्यःया न्ह्यःने छपु यःसिं थनेगु याइ। वकुन्हु हे नेपाःमितय् नं थःगु छेँखापतिकं कःसिइ पं छपु थनाः च्वय् थ्यंक मत च्याकाः खायेगु याइ। थ्व मत लछियंकं खाइ। थौंकन्हय् धाःसा थथे मत च्याकेगु चलन म्हो जुयावंगु खनेदु। थ्व मतयात आलमत धाइ। आकास (आलः) यात बीगु मत जूगुलिं थुकियात आलमत धाइगु खः ।

वंगलय् थ्व यःसिं थनेगु चलन गबलें निसें वयाच्वंगु धइगु बारे उलि जानकारी दुगु खनेमदु। थ्व बारे श्री भैरवनाथ लिङ्गो गुथि संचालक समितिया महासचिव शरदकुमार डंगोलयाके न्यनाबलय् वय्कलं धयादिल 'थ्व यःसि नं पौराणिक कालंनिसें वयाच्वंगु खः। थ्व हे इलंनिसें वःगु धकाः धाःसा छुं सी मखु ।'

त्रिविया प्राध्यापक व संस्कृतिविद् बलदेव जुजुं थुकिया बारे थ्व मोहनि सिधःगु पुन्हि कुन्हु आजुद्यःया न्ह्यःने धस्वाकेगु यःसिं मखु, थुकियात आलमत धाइ। येँयाःबलय् लाय्कुली थनीगु जक यःसिं खः।' थ्व चलन यक्व न्ह्यवंनिसें वयाच्वंगु खनेदु। थ्व इन्द्रद्यःयात पव्रथाना याइगु कथं आकाशदीप बीगु जुइफु धइगु नं जनधारणा दु ।

थ्व मत बीगुया कारणं छु ले? धइगु बारे बलदेव जजुं धयादी 'इन्द्र द्यःयात आः वा वयेका बीमते, बरु खसु वयेका बिउ धकाः प्रार्थना यासें थ्व आकाशदीप च्याकेगु यानातःगु खः।'
मोहनिबलय् भुतुमालि ब्वयेकेगु धइगु नं इन्द्र द्यःयात अप्वः वा वल धाःसा झीगु बुँइ सयाच्वगु या रुपय् पौ च्वःगु खः धइगु नं वय्कःया धापू दु ।

आजुद्यःया न्ह्यःने यःसिं धस्वाकेगु चलन द्यःयात लय्ताकेगु कथं खयेफु धइगु नं जन विश्वास दु। आजुद्यः जंगली अवस्थायाम्ह किराँती जुजु यलम्बरया रुप खः धइगु धापू दु। आजुद्यःयात थौंकन्हय् मारवाडीतय्सं 'श्याम बाबा' या रुपय् माने याना वयाच्वंगु दु। आजु द्यःयात नियमित कथं पुजा याःसा व्यापारिक दृष्टिकोणं यक्व बांलाना वइ धइगु मारवाडीतय् विश्वास दु। नेपाःमितय्सं ला आजुद्यःयात छगू तःधंगु शक्ति पीठ कथं माने याना वयाच्वंगु ला द हे दु। आजु द्यःयात स्वच्छ मनं पुजा पाठ यानाः मत बिल धाःसा थःगु मनय् तःगु इच्छा पूवनी धइगु नं जनविश्वास दु ।

न्हापांनिसें आजुद्यःया न्ह्यःने थुगु यःसिं थनेगु ज्या श्री आकास भैरवनाथ लिङ्गो गुथीया सक्रियताय् जुइगु खः। थ्व दछिया निकः मोहनिया पुन्हि व पाहांचःर्‍हे छन्हु न्ह्यः थनेगु याना वयाच्वंगु दु। झिंच्यादँ नीदँ न्ह्यः थ्व यःसिं बिसंखु नारायण द्यःया जंगल हइगु जुयाच्वन तर थुगुसी धाःसा यक्व हे पुलां जुइ धुंकूगुलिं चोभारया जंगल श्री आदिनाथ सामुदायिक वन उपभोक्ता समूहया स्वीकृति कयाः न्हूगु यसिं हःगु खः। थ्व यःसिं म्होतिं नं पीदँ तक तुइके फइला धइगु श्री आकाश भैरवनाथ लिङ्गो गुथीया दुजःपिनि धापू दु ।

More Stories Like this