फिं ल्हानाः न्याम्ह सित

ख्वपया फि खानीइ धिक्का कुतुं वयाः दुर्घटना

स्वंगः ट्रक नं ल्हानाच्वंगु दनि / अस्पतालय् स्वम्ह घाइते भर्ना

ख्वप (सन्ध्या टाइम्स)/थनया दुवाकोट गाविस वडा नम्बर ६ या फि खानीइ थौं सुथय् फिं ल्हानाः न्याम्ह मनू सीगु दु। अथे हे उकी लानाः मेपिं स्वम्ह घाःपाः जूगु दुसा अझ मेपिं नं ल्हानाच्वंगु दनि ला धकाः मालेत अन फि लिकायेगु ज्या जुयाच्वंगु दु ।

खानीइ फि लिकाकां हे आकाझाकां च्वय्या धिक्का कुतुं वयाः आपालं मनूत ल्हाःगु खः। उकी लानाः रामेछापया फुर्वा तामाङ (२८ दँ), काभ्रेया चन्चले थिङ (३०), दोल्खाया कृष्णप्रसाद फुयाल (३४), दावा शेर्पा (४५) व रोहित कुमार थिङ्ग (२९) सीगु खः ।

फि चीकाः उमिगु लाश लिकायेधुंकूगु दुसा पोष्टमार्टमया लागिं लाश प्रहरीं शिक्षण अस्पताल यंकूगु दु ।

अथे हे उकी लानाः घाःपाः जूपिं रामबहादुर लामा, अस्मिता लामा व देवीमाया लामायात ख्वप अस्पतालय् वासः याकातःगु दु। फिया धिक्का कुतुं वयाः फि ल्ह्ययेत अन दिकातःगु स्वंगः ट्रक नं ल्हाःगु खँ धाःगु दु ।

घटना जूगु इलय् अन करिब पीम्ह मनूत ज्या यानाच्वंगु दुगुलिं मेपिं नं ल्हाःगु दयेमाः धकाः अझ नं मालेगु ज्या न्ह्यानाच्वंगु दनि। सकलें ज्यामि गाः म्हुयाः फि लिकयाच्वंगु इलय् च्वय्या धिक्का कुतुं वयाः सकलें गालय् ल्हाःगु खः।
घटना लिपा उगु फि खानी सञ्चालन यानाच्वंम्ह सरोज थापायात ज्वनाः कारवाही यायेत ज्यामितय्सं माग याःगु खःसां प्रहरीं मज्वंगु खँय् ज्यामित तम्वःगु दु। उमिसं घाःपाः जूपिंत बांलाक वासः यायेमाःगु व सीपिनि छेँजःयात उचित क्षतिपूर्ति बीत नं माग यानाच्वंगु दु ।

थौंकन्हय् ख्वपय् अप्पा भट्टा हानं शुरु जूगुलिं उकिया लागिं अन आपालं मनूतय्सं फि काः वयाच्वंगु खः। मनोहरा खुसिया जःखः लाःगु थ्व थाय् स्वनिगलय् दकलय् बांलाःगु फि दइगु लागा खः। स्वनिगः जक मखु स्वनिगलं पिने तकं थीथी थासय् थनया फि यंकेगु यानाच्वंगु दु। अन फि लिकायेगु लागिं स्थानीय जिविस व गाविस जानाः ठेक्का बीगु खः ।

फि लिकायेगु झ्वलय् अन न्हापा न्हापा नं तःक्वःमछि हे थज्याःगु दुर्घटना जुइधुंकूसां उकियात म्हो यायेगु बारे धाःसा गुगुं नं निकायं ध्यान मबिउगु खँ ज्यामितय्सं धाःगु दु ।