३ गते नेवाःतय् वृहत् प्रदर्शन
मंकाः नेवाः आन्दोलनया घोषणा
नेवाःतय् राष्ट्रिय संगठन नेवाः देय् दबू नापं थीथी नेवाः संघ संस्था व राजनीतिक पार्टीया जातीय कवः जाना नीस्वंगु नेवाः स्वायत्त राज्य मंकाः संघर्ष समितिं नेवाःतय् शक्ति प्रदर्शन याये कथं थ्वहे माघ ३ गते शुक्रवाः येँय् छगू विशाल प्रदर्शन याइगु जूगु दु । म्हिगः राष्ट्रिय सभागृहय् जूगु समितिया घोषणा सभाय् थुकिया जानकारी बिउगु खः ।
नेवाः स्वायत्त राज्य मंकाः संघर्ष समिति घोषणा सभाय् न्ववानादिसें नेवाः देय् दबूया नायः मल्ल के. सुन्दरं छुं नं राजनीतिक पार्टीया मातहतय् मच्वंसे मुक्कं नेवाः जातिया हितया निंतिं ज्या याना वनेत थुगु संघर्ष समिति नीस्वनेमाःगु खँ कनादिल । नेवाः देय् गुथि नेपाल मण्डलया नायः नरेन्द्रभक्त हाडां स्वनिगलय् नेवाःतय्त अग्राधिकार दयेमाःगु मागयात संघर्ष समितिं ल्ह्वनेमाः धयादिल ।
नेवाः राष्ट्रिय मुक्ति मोर्चाया नायः व सभासद् हितमान शाक्यं नेवाः लागाया सीमा स्वनिगः जक मखु धासें थ्वया जःखःया लागा नं स्वानाः नेवाः राज्य दयेकेमाः धयादिल । वय्कलं नेवाः राज्ययात राजधानी प्रदेश दयेकेगु खँयात थःपिंसं स्वीकार मयायेगु खँ नं कनादिल । नेपाः लोकतान्त्रिक नेवाः संघया नायः सानुराजा शाक्यं थौं नेवाःतय् निंतिं नेवाःत हे दनाः राजनीति यायेमाःगु ई वयाच्वंगु दु धयादिल । नेपाः राष्ट्रिय पार्टीया मूछ्यांज्ये विजय सैंजुं नेवाःतय् सः फुक्क नेवाः सभासद्तय्सं संविधानसभाय् थ्वयेकेमाः धयादिल । नेवाः जागरण माचया संयोजक सुजीव बज्राचार्यं नेवाःतय् आदिभूमि स्वनिगःयात नेवाः स्वायत्त राज्य कथं कायम याकेत थःपिंसं संघर्ष यानाच्वनागु खँ कनादिल ।
ज्याझ्वलय् नेपालभाषा मंकाः खलःया नायः पद्मरत्न तुलाधर, प्रा. माणिकलाल श्रेष्ठ व भीमसेनदास प्रधानिपंसं नेवाः स्वायत्त राज्य कायम याकेगु संघर्षय् थीथी राजनीतिक वादपाखें अलग्ग जुयाः संघर्ष यायेत सकसितं इनाप यानादिल । ज्याझ्वः संघर्ष समितिया नायः दिलबहादुर श्रेष्ठया सभापतित्वय् जूगु खः ।
