माग पूवंकेत हानं आन्दोलन

माओवादीं आन्दोलन यायेगु धकाः घोषणा यायेवं थीथी जातीय पुचःतय्सं नं आन्दोलन शुरु यायेगु संकेत क्यना हःगु दु। थुकी मधेशी जनअधिकार फोरम नापं लिम्बुवानया थीथी पुचःत न्ह्यःने वःगु दुसा उमिसं आन्दोलनया तयारी नापं शुरु याःगु दु। उमिसं यायेत्यंगु आन्दोलनया त्वहया रुपय् न्हापा थःपिंलिसे सरकारं याःगु सहमति कार्यान्वयन यायेमाः धइगु खँ न्ह्यथंगु खः। थ्व पुचःतय्सं दछि दत्या ति न्ह्यः तःधंक आन्दोलन याःबलय् सरकारं उपिंलिसे वार्ता यानाः उमिसं न्ह्यःने हयाच्वंगु गुलिखे माग पूवंका बी धकाः सम्झौता याःगु खः। तर सम्झौता क्वचायेकाः आन्दोलन दिकेसातकि सरकारं नं उमिगु मागपाखे ध्यान बीगु त्वःता हल। खला सरकार टिके यायेमाःगु मुख्य समस्यापाखें हे फुर्सद मदुगु कारणं नं सरकारं उमिगु मागयात कयाः बिचाः याये लानाच्वंगु मदु। तर आः आन्दोलनया माहौल पिहां वइगु खने दयेवं थीथी पुचःतय्सं थःपिंलिसे जूगु सहमति कार्यान्वयन या धकाः हानं आन्दोलन न्ह्याकेगु कुतः याना हःगु दु। आःयात थज्याःगु कुतः मधेशी व लिम्बुवानं जक याःगु खःसां कन्हय् वनाः थारू, नेवाः, आदिवासी जनजाति महासंघ, दलित आदि समुदायं नं थ्वहे माग न्ह्यःने तयाः आन्दोलन शुरु यायेफु। थुपिंलिसे नं सरकारं माग पूवंका बी धकाः सम्झौताय् हस्ताक्षर याना तःगु दु ।

आन्दोलनकारी पुचःतलिसे वार्ता यायेगु, उमिसं धाःगु माग पूवंका बी धकाः आश्वासन बीगु व लिखित भ्वँतय् सही याना बीगु सरकारया लागिं अःपुगु ज्या खः। तर उकियात पूमवंक धाःसा गज्याःगु समस्या वयेफु धइगु खँ थुकिं क्यना बीत्यंगु दु ।

More Stories Like this