न्युयोर्कय् पेश जुइत्यंगु नेपाःया ख्वाःपाः

नेपालय् न्ह्यानाच्वंगु शान्ति प्रक्रियायात कयाः अनमिन प्रमुख करिन लेनग्रेनं न्युयोर्कया राष्ट्र संघीय सुरक्षा परिषद्यात जानकारी याकेत्यंगु दु। उकिया लागिं वय्कः म्हिगः झायेधुंकूगु दु। छखे देशय् अनमिनं यानाच्वंगु ज्या पाय्छि मजुल धकाः आलोचना जुयाच्वंगु व मेखे राजनीतिक पार्टीतय् दथुइ नं शान्ति सम्झौतायात न्ह्यःने यंकेगु सिबें मेमेगु खँय् विवाद जुयाच्वंगु थ्व अवस्थाय् अनमिन प्रमुखपाखें न्युयोर्कय् नेपाःया गज्याःगु किपा ब्वइगु खः, व आः थथें धायेफुगु स्थिति मदुनि। लिसें वय्कलं बियादीगु नेपाःया प्रतिवेदनय् सुरक्षा परिषदं गज्याःगु प्रतिक्रिया बी, व ला झन् हे धाये फइगु खँ मखुत। अय्नं समग्रय् छु धायेफु धायेबलय् लिपांगु इलय् वयाः नेपाःया शान्ति प्रक्रिया छगू कथं अवरुद्ध अवस्थाय् थ्यंगु दु। खास यानाः माओवादी सरकारं पिहां वयेधुंकाः देशय् न्ह्यानाच्वंगु शान्ति प्रक्रिया पूर्ण रुपं प्रभावित जूगु दु। शान्ति प्रक्रिया न्ह्यःने न्ह्याके मफुगु कारणं यानाः आः सरकार व माओवादी दथुइ जुयाच्वंगु शान्ति सम्झौतायात हे पुनरावलोकन यायेमाः धइगु बिचाः समेत न्ह्यःने हयेगु शुरु याना हःगु दु। थ्व धइगु शान्ति प्रक्रिया दथुइ दिनाच्वंगु जक मखु थ्व गन दिनाच्वंगु खः अनं च्वय् न्ह्याः वनी धइगु खँय् पत्याः यायेगु नं त्वःता हःगुया चिं खः। नेपाःया शान्ति प्रक्रिया छगू कथं विदेशीतय्सं बः बियाः न्ह्यानाच्वंगु व उमिगु हे आर्थिक अनुदानं टिके जुयाच्वंगु खः। थुकियात वयाच्वंगु वैदेशिक ग्वाहालि आः छु जुइ धइगु खँ सम्भवतः न्युयोर्कय् पेश जुइगु नेपाःया वर्तमान अवस्थाया किपां नं निर्धारित याइ। तर झीसं थुइकेमाः, शान्ति प्रक्रिया केवल विदेशीया इच्छा व तिबलं जक सफल जुइ मखु ।

More Stories Like this