तर गो !

नर्मदेश्वर प्रधान

मोहनि। स्वन्ति। छठ। नखः पर्वत क्वचाल। नेपाल संवत् हिली। थ्वहे ताकय्। अनेक ज्याझ्वः क्वचाइ जुइ। सांस्कृतिक पर्वतय् सिजन। मौसम। सकसित न्ह्याइपुइ। स्वभाविक। नखःचखःया इलय्। मनूतय्सं दु-मदु ल्वःमंकी। छछाः साक्क नये। छजु बांलाक पुने। इच्छा याइ। धनी, सम्भ्रान्त मनूतय् सदां साक्क नये दइ। बांलाक पुने खनी। मोहनि स्वन्ति पीम्वाः। सदां मोहनि। सदां स्वन्ति जुइ। तर मदुपिंत अथे मखु। छछाः साक्क नये। बांलाक पुने। दछि पीमाः। मोहनि स्वन्ति वयेकेमाः। अझ गुलिखें मनूतय्सं थुलि नं याये फइ मखु। छुं दइ मखु। दरिद्रतां ग्रष्ट जुइ। दछिइ छकः धयां छु याये ! चू लाइ मखु। प्वाथय् ल्वःमां त्ययेका च्वनेमाली ।

मोहनि। स्वन्ति। छठ। न्ह्याइपुगु नखःत खः थुपिं। तर थुमि सवाः सकसित उत्थें जुइ मखु। दुपिंत माकुइ। साइ। मदुपिंत खाइसे च्वनी। नखः नखः जुया बीमखु। नखः वइ। उमित। ख्वये ला न्हिले ला जुइ। म्हगस खना छु याये। पूवंके फइ मखु। सांस्कृतिक पर्वं मदुपिंत हिस्याइ ।

थौकन्हय् सांस्कृतिक उत्सव पर्वय् राजनैतिक ल्वाकः ज्याना वयाच्वंगु दु। सांस्कृतिक दुने पोलिटिक्स दुहां वइ। मोहनि वइ। नेतातय्सं शुभकामना सन्देश बी। जनताया सुख समृद्धिया कामना याइ। चियापानया होडबाजी। नेतात मुनी। भिंतुना आदान प्रदान याइ। नेपाल संवत् न्हूदँया लसता। अनेक ज्याझ्वः जुइ। राजनीतिक नेतातय्सं ब्वति काइ। जलपान ज्याझ्वःत। पार्टीया नेतात खनेदइ। दंग जुयाः क्यनी। न्हिलाच्वंगु दृश्यत टिभीइ वइ। किपा पत्रिकाय् खने दइ। 'फुक्क ठीक जुइ। याकनं। कचवं फुक्क तनी। पार्टी दथुइया असम्झादारी मोहनी सिधल कि अन्त जुइ।' आश्वासन बी। स्वन्ति वइ। नेपाल संवत्या न्हूदँ वइ। नापलायेगु ज्याझ्वः जुइ। चियापान। शिखर नेतात नाप लाइ। गबलें कामरेड प्रचण्ड दथुइ। झलनाथ, सुशिल कोइराला जःखः। गबलें झलनाथ दथुइ। प्रचण्ड, रामचन्द्र जःखः। गबलें गिरिजाप्रसाद कोइराला केन्द्र। जःखः प्रचण्ड, झलनाथ जुइ। तासया पत्तात। बाछाः, बजीर, गुलाम। ज्याझ्वः पाइ। उमि श्रृंखला, थाय्, भूमिका हिली। चियापान। भेटघाट कार्यक्रम। नेतात नाप लाइ। न्हिली। अभिनय याइ। सन्देश बीत स्वइ। 'जिमि दथुइ छुं समस्या मदु। मित्रता दु। समस्या वार्तां ज्यनी जुइ। याकनं।' विश्वास बी। जनताया थौं नुगः छाइ। नेतातय्त खंकेगु दृष्टि पाइ। उमि आश्वासन फुक्क छलछाम खः। भ्रमजाल खः। जनतां वाःचायेकी। जलपान ज्याझ्वलय् नेतात न्हिलां छु याये ! उमिगु न्हिलाय् देशया सुखद् भविष्यया छुं संकेत मदु। छम्ह खलनायक। न्हिली। न्हिली। न्हिली। तर यथार्थय् व खलनायक हे जुयाच्वनी। वयागु न्हिला सही न्हिला जुइ मखु। धोखा जुइ। प्रसिद्ध नाटककार सेक्सपियरया धापू खः थ्व। चियापानय् नेतात न्हिलाच्वंगु लू लुमनी। सेक्सपियरया थ्व धापू न्ह्यपुइ थ्वइ। देशया नेतात। नायक खः वा खलनायक। तिफ्याये फइ मखु। उमिगु खँ। गतिविधि। बजारी सिनेमाया संवाद, अभिनय खः। वा यथार्थ। सीके फइ मखु। 'संविधान इलय् दयेकेमाः। देशया मखुगु दुर्घटना जुइ।' नेतातय्सं भाषण याइ। खँ रटे याइ। जिम्मा कयाच्वंपिं उपिं नेतात। सुयात न्यंकाच्वंगु खः थ्व उमिसं। देश मखुगु दुर्घटनाय् लाःसा दोष सुयागु जुइ? देश थौं अस्तव्यस्त स्थितिइ। नियम कानुनया छुं मर्यादा मदु। बजाः भाः बेठेगान। सरकार मदुगु देय् थें। न्ह्याम्हेसिनं न्ह्याःगु याःसां जिउ। आर्थिक दलाली नीतिं देय् न्ह्यानाच्वंगु दु। आर्थिक उत्पादन, गतिविधि, विकास छुं मदु। फुक्क दलाली नीतिं हे निर्भर। थुकिं हे संचालित। दलाली अर्थशास्त्र। आर्थशास्त्रया ख्यलय् विश्वयात नेपाःया देन जुइ। सायद, थुकिया लागि अर्थशास्त्रया नोवेल पुरस्कार नेपालं आसा यायेफु ।

नेता गिरिजायात सासः ल्हाये थाकुया वइ। बुखँ ब्वने। म्ह्याय् सुजाता उप प्रधानमन्त्री ला जुइ। गिरिजाया याकुप्वालं हे सत्रुत वइ। पार्टी विरोधी जुइ। सुजाता। पहलमानी कलाय् तालिम कयाः वःम्ह। हृष्टपुष्ट। पार्टीया बैठकय् मल्लयुद्धया हाँक बी वं। थः विपक्षीतय्त। रामचन्द्रयात झन्दै क्वथलेत्यंगु वं ।

कांग्रेस पार्टीइ जक मखु। हरेक पार्टीइ दुने, अन्तरपार्टीइ दथुइ थौं मल्लयुद्धया कासा पपुलर। फुक्क नेतात थ्व कासाय् निपुण। दक्ष। न्हूगु संविधानय् थ्व मल्लयुद्धयात राष्ट्रिय राजनैतिक कासा कथं दुथ्याकेमाः। पार्टीतय् दथुइ एकमत खनेदइ। मेमेगु खँय् बिचाः पाःसां। राष्ट्रिय राजनैतिक कासा कथं मल्लयुद्धं न्हूगु संविधानय् थाय् कायेफत कि पार्टीत खुल्लेयाम ल्वाये दइ। जनतातय्त ल्वाके दइ। ल्वायेगु ल्वाकेगु खुल्ला प्रतियोगिता संवैधानिक जुइ। अले। अहा ! गुलि न्ह्याइपुइ। तर ग्व। न्ह्याइपुइ धयां छु याये। संविधान निर्माण जुइगु गबलय्। बेठेगान तिनि ।

narapradhan@yahoo.com

More Stories Like this