आन्दोलनया ज्याझ्वः दयेकल

अय्नं अन्तिम ई तक कुतः जारी याइगु

राज्ययात असहयोग आन्दोलन / सरकार विरुद्ध नाकाबन्दी

येँ (सन्ध्या टाइम्स)/कांग्रेस व एमाले दथुइ जूगु सहलह असफल जुइवं झिंन्यान्हुया अल्टिमेटम बिउगु एकीकृत नेकपा (माओवादीं) थौं थःपिनि आन्दोलनया ज्याझ्वः क्वःछिउगु दु ।

माओवादीया केन्द्रीय पदाधिकारीतय्गु बैठकं आन्दोलनया थीथी ज्याझ्वः दयेकेत संयुक्त जन आन्दोलन संयोजन समितियात निर्देशन बिउगु दु। उखे उगु निर्देशनयात अक्षरशः पालना यायेगु निर्णय नं संयुक्त जनआन्दोलन समितिं याःगु दु ।

थौं सुथय् च्वंगु संयुक्त जनआन्दोलन समितिया बैठकं आन्दोलनया थीथी ज्याझ्वः क्वःछिउगु खः। आन्दोलनया ज्याझ्वः कथं कार्तिक १५ गते देय्न्यंकं मशाल जुलुस प्रदर्शन यायेगु ग्वसाः दु। अथे हे गाविस ज्याकूनिसें कयाः सिंहदरबार घेराउ यायेगु, देय्न्यंकंया जिल्ला प्रशासन ज्याकुथी धर्ना बीगु, असहयोग आन्दोलन न्ह्याकेगु, संघीय राज्यया घोषणा यायेगु, सरकारयात नाकाबन्दी यायेगु व वयां लिपा लगातार बन्द यायेगु ग्वसाः दु ।

आन्दोलनया ज्याझ्वःयात थौं केन्द्रीय समितिया बैठकं अनुमोदन यायेधुंकाः थौं वा कन्हय् उकियात सार्वजनिक यायेगु तयारी माओवादीं यानाच्वंगु दु ।

थ्वहे झ्वलय् माओवादी अध्यक्ष पुष्पकमल दाहाल 'प्रचण्डं' सहमतिया निंतिं दलतय्त पर्याप्त ई बियागु खँ धयादीगु दु। थौं सुथय् केन्द्रीय पदाधिकारीतय् बैठक क्वचायेकाः पत्रकारतलिसे खँ ल्हासें वय्कलं सहमति कायम जुल धाःसा आन्दोलनया बारे हानं बिचाः याये फइगु खँ नं कनादिल।
केन्द्रीय पदाधिकारीतय् बैठकं कार्तिक १५ गते तक नं सहमति कायम यायेत अधिकतम कुतः यायेगु निर्णय याःगु दु ।

थ्वहे झ्वलय् सहमति कायम यायेगु निंतिं थौं स्वंगू दलया बैठक च्वनेत्यंगु दु। म्हिगः च्वने धाःगु बैठक कांग्रेस सभापति गिरिजाप्रसाद कोइराला म्हं मफयाः च्वने मफुगुलिं थौं च्वनेत्यंगु खः ।

व स्वयां न्ह्यः माओवादी व एमालेया बिस्कं बैठक च्वनेगु तयारी नं जुयाच्वंगु दु। उगु बैठकय् माओवादीयात थःपिनि मागय् लचिलो जुइत इनाप यायेगु खँ एमाले नेता युवराज ज्ञवालीं धयादीगु दु ।

म्हिगः च्वंगु झिंन्यागू दलया बैठकं माओवादी आन्दोलनया सामना यायेगु निर्णय याःगु खः ।