कंस आन्दोलन घोषणा

आन्दोलनया लागिं माओवादीया प्रशिक्षण न्ह्यात

येँ (सन्ध्या टाइम्स)/स्वंगू दल दथुइ न्ह्यानाच्वंगु वार्तां सहमति पिकाइगु सम्भावना म्हो जक दु धासें आन्दोलनया निंतिं तयार जुयाच्वनेत माओवादी अध्यक्ष प्रचण्डं थीथी राज्य समितियात निर्देशन बियादीगु दु ।

पार्टीया मू ज्याकू पेरिस डाँडाय् माओवादीया मधेश राज्य समितिया दुजःपिंत प्रशिक्षण बीगु झ्वलय् वय्कलं उगु निर्देशन बियादीगु खः ।

प्रशिक्षणया झ्वलय् माओवादी अध्यक्षं थ्वहे वइगु कार्तिक १५ गतेनिसें थःपिंसं न्ह्याकेत्यनागु आन्दोलनया स्वरुप, उकिया तयारी व भावी कार्यदिशाया बारे ध्वाथुइकादीगु खः।
थ्वहे झ्वलय् माओवादीं आन्दोलनया निंतिं स्वनातःगु संयुक्त जनआन्दोलन संघर्ष समितिया बैठक कन्हय् च्वनीगु जूगु दु। उगु बैठकं कंस हे आन्दोलनया ज्याझ्वः सार्वजनिक यायेगु कथं तयारी याइगु खँ नं धाःगु दु। यदि थौं नं सहमति पिहां वइगु ज्या मजुल धाःसा माओवादीं कंस आन्दोलनया घोषणा याना छ्वयेगु निर्णय यायेधुंकूगु दु ।

माओवादीं आः याइगु आन्दोलनया शुरुइ जनतायात म्हो
जक लिच्वः लाइगु ज्याझ्वः जुइगु खँ धाःगु दु। थुकी खास यानाः मन्त्री व प्रधानमन्त्रीयात कायल यायेगु कथंया ज्याझ्वः वइ धाःगु दु। मन्त्रीतय्त सिंहदरवारय् दुत मछ्वयेगु, थीथी सरकारी ज्याकुथी धर्ना बीगु आदि ज्याझ्वः थुकी जुइगु खँ धाःगु दु ।

माओवादी सूत्रं धाः कथं थ्वयां लिपा नं यदि थःपिनि मागयात संवोधन मयात धाःसा जनताया जनजीवनय् समेत लिच्वः लाइगु ज्याझ्वः घोषणा याना यंकेगु जुइ। आन्दोलनया ज्याझ्वः कथं सदन अवरुद्धयात नं निरन्तरता बीगु जुइ धाःगु दु ।

सदन अवरुद्ध जुयाः साउनं न्ह्यब्वःगु बजेट पारित मजुयाः सरकारयात खर्च यायेत ध्यबाया अभाव जुयाच्वंगु दुसा मेगु महिनां निसें कर्मचारीतय्त तकं तलब नके मफइगु अवस्था वयेफुगु खँ धाःगु दु ।

थ्वहे झ्वलय् सिंचाई मन्त्री बालकृष्ण खाँडं माओवादी तत्काल सहमतिइ मवल धाःसा सरकारया ज्या न्ह्याकेगु निंतिं बल प्रयोग यायेगु ख्याच्वः बियादीगु दु। थौं सुथय् झापाया बिर्तामोडय् ग्वसाः ग्वःगु छगू पत्रकार सम्मेलनय् न्ववासें वय्कलं सरकार माओवादीया न्ह्यःने यक्व हे लचक जुइधुंकूगु दु, आः थ्व स्वयां अप्वः लचक जुइत थाय् मदु, उकिं आः माओवादीं थःगु गतिविधियात मत्वःतल धाःसा सरकारयाके बल छ्यलेगु बाहेक मेगु विकल्प मदुगु खँ नं स्पष्ट यानादीगु दु। वय्कलं कांग्रेसं वर्तमान सरकार महिलीगु खँ नं कनादिल ।