नेपालय् जुइत्यंगु धुँ सम्मेलन

विश्वय् धमाधम दुर्लभ जुजुं वनाच्वंपिं धुँ संरक्षण यायेगु ताः तयाः संसारया धुँ दुपिं १४ गू देतय् सम्मेलन नेपालय् जुइत्यंगु दु। धुँ दुगु विश्वया म्हो जक देय्त मध्यय् नेपाः नं छगू खः। तर नेपालय् धाःसा धुँया ल्याः अप्वया वनेमाःथाय् संरक्षणया वावजुद नं म्हो जुजुं वनाच्वंगु दु। नेपालय् धुँ संरक्षित जुइगु यक्व हे बांलाःगु थाय्त दुसां नं सुरक्षित जुइगु थाय् धाःसा मदु। खास यानाः चोरी शिकारीया कारणं नेपालय् धुँ खतराय् लानाच्वंगु दु। नेपाःया धुँ खतराय् लाःगुया छता कारण नेपाःया सीमा विश्वया हे दकलय् तःधंगु धुँया अंग व्यापार जुइगु देय् चीनलिसे स्वाःगुलिं नं खः। चीन विश्वया दकलय् तःधंगु धुँया अंग बजार खः। चीनं धुँया कृत्रिम गर्भाधान यानाः जूसां थुकिया अंग व्यापार यायेमाः धइगु विषयय् विश्वन्यंकं लबिंग हे यानाच्वंगु दु। नेपालय् धुँ स्यानाः उकिया अंग चीन यंके उलि थाकु मजू। उकिं नं नेपालय् धुँया चोरी शिकार जुइगु अप्वयाच्वंगु खः।
धुँ विश्वय् हे दकलय् आकर्षक जंगली जन्तु खः। थुकिया संरक्षण पृथ्वीया शोभा कायम याना तयेत जक मखु स्वयम् मनूया वस्ती ल्यंका तयेत नं आवश्यक जू। गुलि धुँया ल्याः अप्वइ उलि हे जंगलया लागा नं कायम जुयाच्वनी। गुलि वन जंगल अप्वः कायम जुयाच्वनी उलि विश्व पर्यावरण सुरक्षित जुयाच्वनी। धुँयात त्वह दयेकाः नं पृथ्वीया पर्यावरण ल्यंकेगु अभियान न्ह्यःने यंके जिउ ।

आः जुइत्यंगु सम्मेलनं धुँया संरक्षण केवल छम्ह जीव ल्यंकेगु ल्याखं जक मखु मुक्कं पृथ्वी बचे यायेगु ल्याखं नं अत्यावश्यक खः धइगु सन्देश प्रशारण यायेगु ज्या जुइमाः ।

More Stories Like this