प्रमया राजीनामां जक निकास वइ

तारण शाक्य

प्रजातन्त्र व लोकतन्त्रयात संरक्षण बी मफयेव दक्षिणपन्थी राजनैतिक गतिरोधं पनाच्वंगु देय्या राजनीतियात वामपन्थी राजनीतिं सुथां लाकेगु राजनीतिक निकास मालेत माओवादी नेता प्रचण्डं चीन भ्रमण याःगु खः धायेथाय् दु।
प्रजातान्त्रिक पद्धतिया नामं नेतातय्सं देय् व जनतायात परवाह मयासे नेतागिरीतन्त्रया विकास यानाः खुसःम्ह सभासद्तय्गु खेती यानाः नं देय् व जनतायात सुधार याये मफयाः देय्या राजनैतिक अवस्था अस्थिर जुजुं वनाच्वंगु यचुक खने दु। आपालं पार्टीया नेतातय्त मन्त्री दयेकाः विश्व भ्रमण यायेगु मौका बियाः सत्ता कब्जा यानाच्वंगु थ्व सरकारया नीतियात जनतां हे मययेके धुंकल। धाथें थ्व सरकारं पार्टी व नेतातय्गु चरित्र हत्या यानाः देय्या धुकू फुकेगु ज्या हे जक यानाच्वंगु दु। देय् व जनताया निंतिं थुपिं अयोग्य, असक्षम साबित जुइधुंकल। माओवादीतसें थ्व सरकारयात अयोग्य, असंवैधानिक धाःगु पाय्छि हे खः। जनसमर्थनं च्यूत जूगु थ्व सरकार नीनिगू पार्टीया नेतातय्गु नेतागिरीतन्त्रं दयेकूगु जम्बो मन्त्रीमण्डल जूसां माओवादीया समर्थन मंत धाःसा गुगुं नं इलय् क्वःदले फइगु सम्भावना कायम हे दु। नीनिगू दल जानाः नं मफु मफु थामे यायेमाःगु थ्व सरकारया अवस्था स्वयाः थुकियात समर्थन यानाच्वंपिं नेता व पार्टीतसें थःपिं धाथें असक्षम, अदुरदर्शी व राजनैतिक अज्ञानी हे खः धकाः थुइकाः छ्यों क्वछुके म्वाःला? सरकारया मू हा धयागु संसद खः। संसद तक हे न्ह्याके मफुगु थ्व जम्बो मन्त्रिमण्डलं खालि तलब नयेगु व प्रशासनय् हस्तक्षेप यानाः अराजक ज्या जक यानाच्वंगु दु।
प्रचण्ड चीन वनाः न्हूगु राजनीति चरित्र दयेकेत याःगु कुतः बांलाः हे जू। प्रजातान्त्रिक पद्धति साप हे बांलाःगु व देय्यात ल्वःगु पद्धति खःसां नं प्रजातन्त्र व लोकतन्त्र छ्यलीपिं नेतातसें लँ द्वंकल धाःसा दुर्घटना जुइगु स्वाभाविक जूवनी। अथे जूगुलिं प्रजातन्त्रया विकल्प मालेगु देय् व जनताया निंतिं हथाय् जुइधुंकल। प्रचण्डया चीन भ्रमण धाथें सफल जुल धाःसा देय् व जनतां न्हूगु किरणया आशा यायेथाय् दु। देय् प्रति कांग्रेसया तःधंगु योगदान दु। उकिया श्रय श्रद्धेय नेता विश्वेश्वरप्रसाद कोइरालायात वनी। विश्वेश्वर कोइरालाया नामं लबः नयाः किजा गिरिजाप्रसादं कांग्रेस पार्टीयात हे थः याकःचिगु याना बिल। थौं कांग्रेस पार्टी धायेबलय् छि जि मखु गिरिजाप्रसाद कोइराला जुइधुंकल। कांग्रेस नेतातय्गु अस्तित्व धइगु गिरिजाप्रसाद कोइरालाया कर्मचारी जुइधुंकल। कांग्रेस व प्रजातन्त्रया नामं लबः ननं देय् व जनताय् अस्थिरता ब्वलंकाः प्रजातन्त्रया उपहास याइपिं नेतातय्गु अराजनैतिक चरित्र व एमाले थेंज्याःगु प्रजातन्त्रया परिभाषा हे मसिउगु पार्टीं प्रजातन्त्रया नामं सत्ता न्ह्याकाः गथे देय् व जनताया उन्नति व प्रगति जुइ फइ ?

माओवादीतय्गु धापू कथं माधव नेपालया सरकार कतांमरि साबित जुजुं वनाच्वन। नकतिनि भारत व चीन भ्रमण लिहां वयाः राजनीतिया खँग्वः थुइका वःम्ह सुजाता कोइरालायात परराष्ट्र मन्त्रीपाखें पदोन्नती यानाः उपप्रधानमन्त्री दयेका बिल। सत्ता कब्जा यायेत एमाले नेतात गुलि तक कुहां वनेफु धकाः सुजातायात उपप्रधानमन्त्री पद बियाः माधव नेपालं साबित याना बिल ।

जनतां तिरष्कार याःम्ह प्रधानमन्त्री, जनतां तिरष्कार याःम्ह उपप्रधानमन्त्री नियुक्त यानाः प्रजातन्त्र व लोकतन्त्रया उपहास मजू ला? संविधानसभा व शान्ति सुरक्षा धइगु देय्या नां कायेगु भाःपियाः गथे राज्य न्ह्याके फइ? संसद अवरुद्धं सरकारया सासः कुनेधुंकल, अथे नं एमालेया सरकारं सुजाता कोइरालायात उपप्रधानमन्त्री दयेकाः अक्सिजन तयाः सासः ल्हायेगु कुतः यानाच्वन तिनि। माधव नेपाल यदि स्वच्छ व देय् प्रति निष्ठा दुम्ह राजनैतिक कासामि खःसा प्रचण्डं थें प्रधानमन्त्री पदं राजीनामा बियाः थःगु व्यक्तित्व व आस्थायात स्यनेगुपाखें ल्यंकेगु कुतः यायेमाः। नेतां थ्व खँ महसुस मयाःगु मखु। अथे नं जनताया मिखाय् धुलं छ्वाकेगु कुतः याना हे च्वन तिनि। हरेक नेतातय्गु कासा म्हितेगु तरिका जनतां न्हापा हे सिउ। जनतायात ध्वं लायेगु ज्या सुं नं नेतां मयात धाःसा थ्वहे उमिगु लागिं बुद्धिमानी जुइ ।

नीनिगू प्रजातान्त्रिक धाःगु पार्टीतय्सं प्रधानमन्त्री नेपालयात मफु मफु ब्वहलय् कुबियाः असंवैधानिक सरकारयात म्वाकुसें जनमतया अवमूल्यन यानाच्वंगु दु। गिरिजाया न्ह्यःने माधवया अस्तित्व मदु। वं चाहे जुल धाःसा माओवादीयात बाध्य यानाः राजीनामा याकू थें माधवजुयात नं वहे अवस्थाय् थ्यंकेफु। अथे जुयाः हे सुजातायात उपप्रधानमन्त्री दयेकेत वय्कः बाध्य जूगु खः। गिरिजाया थज्याःगु दवावय् च्वनाः माधव नेपालं न्हूगु संविधान च्वयेगु देय्या मुख्य ज्यायात नेतृत्व बी फइ ला ?

More Stories Like this