थौं पत्रकारतय् विरोध प्रदर्शन
आक्रमणकारीयात कारवाही जुइः प्रचण्ड
हिमाल खबरपत्रिकाय् माओवादी कार्यकर्तातय्सं याःगु आक्रमणया विरोधय् थौं नेपाल पत्रकार महासंघं प्रदर्शन याइगु जूगु दु । थौं न्हिनय् ३ बजे पत्रकार महासंघया आह्वानय् न्हू वानेश्वरंनिसें माइतीघर मण्डलाय् तक र्याली पिकायेत्यंगु दु ।
महासंघया छ्यांज्ये रामजी दाहालं 'सन्ध्या टाइम्स'यात कनादी कथं थ्व घटनाया विरोधय् महासंघं चरणवद्ध आन्दोलन तकं याइगु सम्भावना दु । थौं थुकिया बारे बैठक च्वनाः छु यायेगु धकाः निर्णय याइ ।
उखे माओवादी अध्यक्ष नं जुयाच्वंम्ह प्रधानमन्त्री पुष्पकमलदाहाल 'प्रचण्डं' हिमाल पत्रिकाय् जूगु आक्रमणया छानबीन यानाः दोषीयात कारवाही यायेगु आश्वासन बियादीगु दु । वय्कलं थ्व तोडफोड माओवादीं याःगु मखुसें माओवादीया नामय् घुसपैठ जुयाच्वंपिंसं याःगु खः धासें थुकिया छानबीन यायेगु खँ नं कनादीगु दु । थौं सुथय् मोडेल अस्पतालया व्यवस्थापन व माओवादी मजदूरया दथुइ ब्वलनाच्वंगु विवाद ज्यंकेगु निंतिं नागरिक समाजया न्ह्यलुवाःतलिसे वार्ता यायेगु झ्वलय् वय्कलं उगु खँ धयादीगु खः ।
हिमाल मिडियाय् आक्रमण याःपिंत कारवाही यायेगु प्रतिवद्धता प्वंकादिसें वय्कलं घुसपैठियातय्सं यानाः देय्न्यंकं अराजकता ब्वलनाच्वंगु खँ नं कनादिल । घुसपैठियातय् विरुद्ध पार्टी दुने हे आन्तरिक संघर्ष जुयाच्वंगु खँ कनादिसें वय्कलं अज्याःपिनि विरुद्ध कडा पलाः ल्ह्वनेत नं इनाप यानादिल ।
माओवादी समर्थित अखिल नेपाल होटेल तथा रेष्टुराँ मजदूर संघ व संचार तथा छापाखाना मजदूर युनियनं म्हिगः हिमाल खबरपत्रिकाया हात्तिवनस्थित ज्याकुथी वनाः उगु तोडफोड याःगु खः । उमिसं अन वनाः पत्रिका ज्याकूया न्हाय्कं तोडफोड यासें अन ज्या यानाच्वंपिं कर्मचारीतय्त नं ल्हाः तयाः घाःपाः याना थकूगु खः । उकी लानाः 'नेपाली टाइम्स' वाःपौया सम्पादक कुन्द दीक्षित नापं हिमालया संवाददाता डम्बरकृष्ण श्रेष्ठ व मेपिं नापं यानाः झिंनिम्ह घाःपाः जूगु खँ धाःगु दु । घटना लिपा थीथी राजनीतिक पार्टीया नेतात हिमाल ज्याकुथी वनाः अन जूगु तोडफोड स्वयादीगु खः ।
उखे माओवादी मजदूर नेता शालिकराम जम्मकटेलं धाःसा घटनाय् थःपिनि बचाउ यायेत स्वःगु दु । सभासद् नं जुयाच्वंम्ह वय्कलं म्हिगः संसदय् न्ववासें थःपिनि बारे 'हिमाल' पत्रिकाय् पिहां वःगु समाचार बारे खँ ल्हायेत वंपिं थः कार्यकर्तायात अनया कर्मचारीतय्सं दुव्र्यवहार याःगुलिं अज्याःगु घटना जूवंगु खँ कनादीगु दु ।
