ढोंगी पंडितया खँ न्यनाः मस्त मजुइ

डी. आर. खड्गे

एशियाया विकसित देश जापान, थाइल्याण्ड, मलेशिया नं खः। थ्व स्वंगू देशय् संवैधानिक राजतन्त्र दु। जापान व थाइल्याण्डय् वंशया आधारय् जुजु जुइगु परम्परा दुसा मलेशियाय् जुजु जुइगु नं बिस्कं प्रणाली दु। अथे धयागु वंशया आधारय् मखु, पाः पाः यानाः छगू छगू प्रान्तया उच्च व्यक्तित्वयात राजगद्दीइ तयेगु परम्परा दु। मलेशियाया जुजु नं रबर स्टाम्प थें जक खः। राज्य संचालनया सम्पूर्ण ज्याया अधिकार मन्त्रिपरिषद्याके जक दयाच्वनी। मलेशियाया विकास उबलय् जक जूगु खः जब देशभक्तप विवेकी व सक्षम नेता महाथीरया ल्हातय् सत्ता चले यायेगु अवसर वल। प्रधानमन्त्री महाथीरं देय्यात चमत्कारी ढंगं विकास यानाः क्यना बिल। मलेशियाया इतिहासं नं क्यना बिउगु दु सक्षम देशभक्तया ल्हातय् सत्ता वल धाःसा देय्यात विकास यानाः क्यनेफु धयागु खँ ।

मलेशियाय् ६५ प्रतिशत मुस्लिम दु। चिनियाँ मूलया नागरिक १५ प्रतिशत, भारतीय मूलया ८ प्रतिशत दुसा मेगु छुं भचा जनजाति नं दु। मलेशिया नं बहुभाषा बहुसंस्कृतिया देश खः। मलेशिया सन् १९५६ पाखे विदेशी उपनिवेशं मुक्त जूगु खः। देय् मुक्त जुयाः छुं दँ लिपा भूमिया विवादं यानाः इन्डोनेशिया नाप युद्ध जुल। युद्ध क्वचायेवं हानं छुं दँ लिपा देशय् जातीय दंगा जुल। मुस्मां समुदायया शिया व सुन्नी दथुइ उगु दंगा जूगु खः। मुस्मां व गैर मुस्मां दथुया उगु दंगां यक्व धनजन नाश जुल। जातीय दंगा नं शिथिल जुल हानं वर्ग संघर्षया नामं कम्यूनिष्टतय्सं तच्वःगु आन्दोलन यानाः देशय् अशान्ति व भयया वातावरण ब्वलंकल। कम्यूनिष्ट नेतातय्गु छगू आकर्षक नारा खः शोषणरहित समाजया सिर्जना। शोषणरहित समाज सिर्जना यानाः समाजवादी व्यवस्था हयाः मध्यम व निम्नमध्यम जनताया नयेगु, त्वनेगु, पुनेगु समस्या हल यायेगु धकाः आश्वासन बियाः जनतायात आकर्षित यायेत सफल जुइ। साधारण जनतां नं थथे थुइकाच्वनी जनतायात मुक्त याइपिं कम्युनिष्ट नेतात खः। तर थ्वहे तःधंगु भ्रम खः। छाय्धाःसा थनया कम्यूनिष्ट नेतात ह्यांगु लैं थें पिनें क्रान्तिकारी जुयाच्वनी दुनें सामन्तीया जीवनशैली म्वानाच्वनी। झीगु धापू कम्यूनिष्ट पार्टीयात विरोध मखु। झीगु विरोध खालि नकली कम्युनिष्ट नेतातपाखें होशियार जुइमाल धायेत्यनागु जक खः। झीथाय् जक मखु विश्वया यक्व देशय् कम्युनिष्टया नामं सत्ताय् वनी। सत्ताय् वनकि पुँजीवादया संशोधन लाइन ज्वनाः जनतायात शोषण यानाच्वनी। झीगु देशय् थथे जुयाच्वंगु थें च्वं। कम्यूनिष्टया नामं कम्यूनिष्ट विरोधीतय्सं पार्टी कब्जा यानाच्वंगु दु। थनया नेतातय्गु इतिहास स्वत धाःसा स्पष्ट जू नेताया वंश हे न्हापांनिसें राणा खलः व शाह राजपुतया चाकरी याना वयाच्वंपिं खः। वहे कारणं यानाः थनया नेतात नं जनताया पक्षय् मवँसें सामन्ती व पुँजीवादी लाइनय् वनाच्वंगु खः। बरु कम्यूनिष्ट शासन मदुगु मलेशियाया नेतातय्सं विश्व बैंक व मुद्रा कोषया घातक शर्तयात अस्वीकार यानाः उमिके त्यासा कायेगु ज्या याइ मखु। मलेशियाया सरकारं थःगु देय्या प्राकृतिक श्रोत व साधनयात सही ढंगं उपयोग यानाः देय्या आर्थिक स्थिति क्वातुकाच्वंगु दु। विश्व बैंक व मुद्रा कोषया घातक शर्तयात राष्ट्रवादी नेतातय्सं जक अस्वीकार याइ। विश्व बैंक व मुद्रा कोषया शर्त स्वीकार यायेगुया अर्थ खः देय्यात अर्ध उपनिवेशय् तयेगु। मलेशियाया नेतात सक्षम व विवेकी खः धयागु प्रस्ट जुल छाय्धाःसां उपिं त्यासा कयाः करोडौं डलर कमिशनय् नयेगु ज्याय् गबलें पँसे मजू। तर नेपाःया नेतातय्सं जक मखु विश्वया आपालं देय्या नेतातय्सं विश्व बैंक व मुद्रा कोषया घातक शर्तयात स्वीकार यानाः त्यासा कया वयाच्वंगु दु ।

वंगु वालय् 'लुक नेपाल' नांगु पत्रिकाय् मलेशियाया बारे बिशेष अंक पिकायेगु झ्वलय् मलेशियाया राजदूत इनकोनाभ कोलानदाभेलुया मन्तव्य कुटनीतिक ख्यः व जनमानसय् अति हे चर्चित जुल। महामहिमं स्पष्ट रुपं धयादिल कि मलेशियाया नेतात व्यक्तिवादी, जातिवादी व पार्टीया स्वार्थ त्वःताः राष्ट्रिय स्वार्थय् ध्यान केन्द्रित यानाः न्ह्यानाच्वंगुलिं देश विकास यायेफुगु खः। मलेशियाय् नं १३ गू जाति व राजनीतिक पार्टीत छप्पँ जुयाः ज्या यानाच्वंगु दु। देय् स्वतन्त्र जुइधुंकाः गुलि नं चुनाव जुल फुक्कँ पार्टीत छप्पँ जुयाः उकी ब्वति काल। चुनाव धुंकाः नं फुक्कं छप्पँ जुयाः च्वने फुगु देय्या लागिं बांलाःगु पक्ष खः। पत्रकारया न्ह्यःने वय्कलं थ्व खँय् नं बः बियादिल कि यदि देय् विकास यायेगु खःसा राजनीतिक स्थिरता, शान्ति व सुरक्षाया आवश्यकता दु। जब देशय् शान्ति सुरक्षा सुरक्षित जुइ व थासय् सामाजिक सौहार्दता धिसि लानाच्वनी। अथे धयागु छगू जातिं मेगु जाति प्रति समान व आदर भाव तयेगु ज्या यानावनी। जब जाति जाति दथुया स्वापू बांलानाच्वनी। धर्म व सांस्कृतिक सौहार्दता नं क्वातुयाच्वनी। राज्यया फुक्क थासय् मेलमिलाप दयाच्वन कि देय् विकास यायेत अःपु धयागु मलेशियां क्यना बिउगु दु। राज्यं प्राथमिकताया आधारय् योजना दयेकाः प्रान्त प्रान्तया विकास यानाच्वनी। मलेशियाय् गरिबया प्रतिशत कम जुया वनाच्वंगु दु। कम जुया वंगुया कारण माध्यमिक तह तकं शिक्षा निःशुल्क, स्वास्थ्य नं जनतायात अति सुविधा व सहुलियत बियाः जनताया आर्थिक भार घटे यानाच्वंगुलिं खः ।

झीगु देय् मलेशिया सिबें नं अप्वः विकास जुइमाःगु खः। थन अमुल्य प्राकृतिक सम्पत्ति यक्व दु। यदि भिंपिं नेतातय्गु ल्हातय् शासन यायेगु अवसर वल धाःसा देय्यात चमत्कारी ढंगं विकास याना क्यनेफु। प्राकृतिक सम्पत्ति लः व मतयात जक सही ढंगं उपयोग याये फत धाःसा देय्या आर्थिक अवस्था ठीक जुइफु। मेखे उद्योग व्यापार व कृषि उत्पादनया ल्याःचाः अलग्ग हे दनि। अथे जूगुलिं आः शासन यानाच्वंपिं व्यक्तिवादी जातिवादी स्वार्थी लालची नेतातय्गु खँ न्यनाः मस्त जुयाच्वन धाःसा झी झन झन बर्बाद जुया वनेफु ।

More Stories Like this