नेवाः सभानेवाः सभासद्तय् मंकाः प्रतिवद्धतासद्तय् मंकाः प्रतिवद्धता

संविधानसभाय् दुथ्याःपिं नेवाः सभासद्तय्सं संघीय गणतन्त्र व नेवाः स्वायत्त नेवाः लागाया मागयात समर्थन यासें मंकाः प्रतिवद्धता व्यक्त याःगु दु। उगु प्रतिवद्धताय् संविधानसभाय् दुथ्याःपिं सकलें नेवाः सभासद्तय्सं हस्ताक्षर मयाःनि, अथे खःसां गुलिस्यां यात उकिं नं नेवाः स्वशासनया लागिं न्ह्यानाच्वंगु आन्दोलनयात अझ गति बीगु विश्वास झीसं यायेफु। न्हूगु संविधान दयेकेगु ज्या संविधानसभां यानाच्वंगु दु। नेवाः स्वशासनयात ग्यारेन्टी याकेगु ज्या संविधानय् हे जुइमाः। उकिं आः जुइगु आन्दोलन सतकय् जक मखु संविधानसभाय् नं न्ह्याकेमाः। थुकिया लागिं संविधानसभाय् दुथ्याःपिं नेवाः सभासद्तय्सं पहल यायेमाःगु अतिकं आवश्यक दु। आः प्रतिवद्धता व्यक्त याःपिं नेवाः सभासद्तय्सं थुकिया निंतिं ज्या याइ धकाः झीसं आशा यायेफु ।

मंकाः प्रतिवद्धता व्यक्त याःपिं सभासद्पिं सकलें थीथी पार्टीलिसे आवद्धपिं खः। थुकी नेमकिपा छगू बाहेक मेगु फुक्क हे पार्टीया सभासद्तय्सं ब्वति काःगु दु। ब्वति काःपिं थीथी पार्टीया सभासद्तय्सं थःपिनि पार्टीया राजनीतिक वादयात त्वःताः नेवाःया लागिं थ्व गुगु कुतः यात थुकियात च्वछाये हे माः। थ्व ई नेवाः जक मखु हरेक जाति जनजातितय्सं थःपिनि म्हसीका न्ह्यब्वयाः उकिया हे लिधंसाय् प्रदेश निर्माण यायेगु ई खः। थुकिया विरुद्ध थीथी पार्टी दुने अझ नं षडयन्त्र जुयाच्वंगु दनि। थुकियात त्वाःथलाः न्ह्याः वनेगु खःसां संविधानसभा दुनेया सकलें जातिया सभासद्तय्सं पहल यायेमाःगु आवश्यकता दु। नेवाः सभासद्तय्सं याःगु थ्व पहलयात मेमेगु जातिया सभासद्तय्सं नं अनुकरण याःसा व बांलाः हे जुइ ।

More Stories Like this