अफगानिस्तानय् हाकनं जुइत्यंगु चुनाव

तसकं धाँधली जूगु आरोप वयेवं अफगानिस्तानय् हानं चुनाव यायेमाःगु अवस्था वःगु दु। चुनावया लिच्वलय् अग्रगति कयाच्वंम्ह वर्तमान राष्ट्रपति हमीद कर्जाइं अन्तर्राष्ट्रिय दवावय् लानाः अन्ततः निला न्ह्यः जूगु चुनाव रद्द यासें थः हानं मेगु चुनाव यायेत तयार दु धकाः घोषणा यायेमाःगु खः। थ्व घोषणाया नापनापं अन जुयाच्वंगु मतगणना दिकूगु दुसा चुनावया न्हूगु तिथि क्वःछीगु लागिं सहलह ब्याकेगु तयारी शुरु जूगु दु ।

तर अफगानिस्तानय् हानं मेगु चुनाव यायेगु अःपुगु ज्या धाःसा मखु। थ्व चुनाव तक हे अन तसकं थाकुक व आपालं मनूतय् ज्यान वंक यायेमाःगु खः। अन सक्रिय जुयाच्वंगु विद्रोही तालिबानी पुचःतय्सं चुनाव याके हे बी मखु धकाः याःगु कुतलं यानाः अफगानिस्तानया चुनाव तसकं हिंसात्मक जूवंगु खः। आः हानं जुइगु चुनाव व स्वयां नं अप्वः हिंसात्मक जुइगु खँय् शंका मदु ।

अफगानिस्तान थौं गुगु अवस्थां न्ह्याः वनाच्वन धइगु खँ विश्वं सिउ। अज्याःगु देशय् तकं सत्तालिप्साय् प्यपुनाच्वंपिं नेतातय्सं धाँधली यानाः जूसां शासन ल्हातय् लाकेगु गलत ज्या यानाच्वंगु दु। थुकियात अन्तर्राष्ट्रिय समुदायं अस्वीकार यात, व बांलाःगु हे खँ जुल। तर अफगानिस्तानय् थौं चुनाव मखु स्थायी शान्ति मालाच्वंगु दु। अमेरिका लगायतया अन्तर्राष्ट्रिय समुदाय अन जुइधुंकूगु चुनाव स्थगित याकेत सफल जूसां अन जारी जुयाच्वंगु हिंसा रद्द याकेत धाःसा आः तकं सफल जूगु मदुनि। देशय् थपाय्धंगु हिंसा जुयाच्वनं नं उकियात समाधान यायेमाः धाइपिं राजनीतिक शक्तितय्गु थज्याःगु रवैया स्वयेबलय् अफगान भविष्य अझ नं तुयूगु खंके थाकुया बिउगु दु ।

More Stories Like this