युवा प्रतिभा रत्नशोभा व सतिश महर्जन

हरिकृष्ण डंगोल

युवा प्रतिभा रत्नशोभा महर्जन

गायनय् वं छुं औपचारिक डिग्री काःगु मदु। यद्यपि वं गायक सतिश महर्जन व डोरेमी स्कूलपाखें छुं भचा संगीतया शिक्षा हासिल याःगु दु। वया सः बांलाः, गायकी बांलाः। योगेश वैद्य थेंज्याःपिं वरिष्ठ गायकपिंसं वयागु गायकीयात तारिफ याःगु दु। व, अर्थात थुगुसीया दान्यहिरा सिरपाः कायेत सफल जूपिं निम्ह गायक मध्ये छम्ह रत्नशोभा महर्जन ।

बौ हिराबहादुर व मां नानीछोरी महर्जनया कोखं सन् १९८५ मार्चया २५ तारिखय् किपुली जन्म जूम्ह मय्जु रत्नशोभा महर्जनं कम उमेरय् हे दान्यहिरा सिरपाः कायेत सफल जुल। २५ दँया उमेरय् हे दान्यहिरा सिरपाः कायेखंम्ह रत्नशोभा महर्जन न्हापांम्ह व्यक्ति खः। सिरपाः कायेखंगुलिं व तसकं लय्ताः। वं धाल - जि तसकं खुसी। नापं ग्याःचिकु नं ब्वलन। ग्याःचिकुया कारण सिरपाःया इज्जत जुयाच्वन। नेपालभाषाया संगीत क्षेत्रय् जिं थःत अझ बांलाका यंके फःसा जक थ्व सिरपा कयागुया महत्व दइ। उकिं थुगु सिरपालं जिम्मेवारी अप्वयेका बिउगु दु। आः थ्व गथे यानाः पूवंकेगु धइगु खँय् जिगु ध्यान केन्द्रित जुइ ।

रत्नशोभाया संगीत यात्रा तःदँ पुलां मजूनि। विगत प्यदँ, न्यादँ न्ह्यःनिसें जक वयागु संगीत यात्रा शुरु जूगु खः। न्हापां 'छंगु लुमन्ति' धइगु सी.डी.इ रत्नशोभाया निपु म्ये दुथ्याःगु खः। तर संगीतप्रति वया रुची धाःसा मचाबलय्निसें हे दुगु जुयाच्वन। आः तक वया याकः सलय् 'छंगु छन्त हे' धइगु सी.डी. एल्बम पिहां वःगु दु। गुगु एल्बमय् जनकवि दुर्गालाल श्रेष्ठया शब्द दुथ्यानाच्वंगु दु। अले थ्व एल्बमय् मनराजा नकःमि, जुगल डंगोल, तिर्थ माली, हरिशरण साय्मि व सुरेन्द्र श्रेष्ठया संगीत दुथ्यानाच्वंगु दु। अथेहे रत्नशोभां द्वाल्खा नेवाःभासं निपु, खय् भासं प्यपु न्यापु म्येँ नं हाले धुंकूगु दु। रत्नशोभां म्येँ जक हालीगु मखु, थीथी बाजं नापं थायेगु याना वयाच्वंगु दु ।

सिंह व खराचिया लोकबाखंया लिधंसाय् च्वयातःगु राजभाइ जकःमिया 'सिंह व खराचां बाखंम्येँय् रत्नशोभाया सः नं थ्वयाच्वंगु दु। गुगु थौंकन्हय् तसकं लोकं नं ह्वानाच्वंगु दु।
थौंकन्हय् त्रिभुवन विश्वविद्यालय् एम.ए. तगिमय् ब्वनाच्वंम्ह रत्नशोभां कम्प्यूटर तालिम कयाः कम्प्यूटर शिक्षिकाया रुपय् ज्या नं यानाच्वंगु दु ।

वया इच्छा, आकांक्षा धइगु नेपालभाषाया संगीत ख्यलय् निरन्तर लगे जुयाच्वनीगु खः। उकिं हे जुइ रत्नशोभां जानकारी बी - जिगु याकः सलय् याकनं हे हानं छचाः सी.डी. पिहां वयेत्यंगु दु ।

युवा गायक सतिश महर्जन

गायन क्षेत्रय् थःगु बिस्कं म्हसीका बियाः थौंकन्हय् थीथी मीडिया चर्चाय् वयाच्वनादीम्ह युवा गायक सतिश महर्जन नं खः। नेपालभाषा संगीत ख्यलय् सतिश महर्जन अझ चर्चित जुयाच्वंगु दु। खय्त नं नेपालभाषाया साहित्य व संगीत ख्यलय् तःजिगु सिरपाः कथं कयातःगु 'दान्यहिरा सिरपाः' थुगुसी वय्कःयात नं लःल्हाःगु दु ।

बौ कृष्णलाल महर्जन व मां दुर्गादेवी महर्जनया कोखं नेपाल संवत् १०९३ पाखे पांगाय् जन्म जूम्ह सतिश महर्जन मचांनिसें हे संगीत ख्यलय् अभिरुचि क्यनाः थुकी लगे जुयादीम्ह खः। छेँया सांगीतिक माहौलं थःत थुकी अभिरुचि जुयावंगु खँ वय्कलं निर्धक्क कनादी। खतुं, वय्कःया बौ भजन हालीम्ह जुयाच्वन। थः बौया सलय् सः मिले यायां वनेगु झ्वलय् वय्कः गायक जुयाः पिहां वल। तर थः गायक जुइगु क्रमय् गुरुपिं रामकृष्ण दुवाल, प्रभुराज ढकाल व पासापिं ज्ञानेश्वर निभाः, न्हुछे दर्शनधारी, राजु महर्जन, वासुदेव डंगोल व इकोष्टा क्लबया हःपाःयात नं वय्कलं लुमंकादी ।

सतिश महर्जन विगत १६ दँनिसें निरन्तर रुपं संगीत ख्यलय् लगे जुया च्वनादीगु दु। थ्व झ्वलय् वयकःया म्येँ दुथ्याःगु 'पासा', 'हावलासा', 'छ व जि व', 'हलिमलि', 'झीगु पलाः', 'जितः लुमंकाः', 'वाफय् वःसा', 'नुगः स्वां', 'निसलिं अय्लाः' आदि यानाः गुंगू म्येँचाः पिदनेधुंकूगु दु। 'हावलासा' वय्कःया म्येँ दुथ्याःगु न्हापांगु सी.डी. म्येँचा खःसा 'नुगः स्वां' वय्कःया न्हापांगु याकः म्येँचाः खः। अथेहे 'निसलिं अय्लाः' म्येचाकय् वय्कःया कलेक्सन म्येँत दुथ्यानाच्वंगु दु। वय्कःया दकलय् न्हापां रिकर्डिङ्ग जूगु म्येँ 'जि वइगु लँपु स्वयाः ...' खः। गुगु म्येँय् ज्ञानेश्वर निभाःनं शब्द व संगीत तयादीगु खः। वय्कःया खय् भाय्या 'पर्फेक्ट' धइगु म्येँचाः नं २०६४ पिदने धुंकूगु दु ।

गायन क्षेत्रय् लगे जुयाः सतिश महर्जनं नेपाल संवत् ११२९ या 'दान्यहिरा सिरपाः' या न्ह्यः २०५२ नच्छेगल्ली युथ क्लबया ग्वसालय् जूगु नेपालभाषा गायन धेंधेंबल्लाखय् न्हाप, २०५६ सालय् रेडियो नेपालया ग्वसालय् जूगु जनसंख्या गायन प्रतियोगिताय् न्हाप, २०५८ सालय् कृष्ण प्रणामी युवा परिषदया ग्वसालय् जूगु भक्ति संगीत प्रतियोगिताय् न्हाप सिरपाः त्याकेधुंकूगु दुसा २०६२ सालय् कीर्तिपुर नगरपालिकाया १० क्वःगु स्थापना दिवसया लसताय् जूगु सांस्कृतिक ज्याझ्वः व २०६४ सालय् गुंगूगु दँया इमेज अवार्डय् नेपालभाषाया दकलय् सकले च्वन्ह्याःगु दँम्येँया गायक जुयाः सम्मानित जुइधुंकूगु दु ।

सतिश महर्जनं शास्त्रीय संगीतया नं विशेष अध्ययन यानादीगु दु। वय्कलं बी म्यूजिकया खुगूगु तगिं पास यायेधुंकूगु दु। सखे थथे हे जुयाः गायन क्षेत्रं म्वाये थाकु मजू ला धइगु न्ह्यसःया लिसः वय्कलं थुकथं बियादी - गायन क्षेत्रय् लगे जुयाः म्वाये फइ मफइ धइगु थःथःगु खँ खः। तर जि थ्व हे ख्यलं म्वानाच्वनागु दु। खः म्येँचाः जक मियाः म्वाये फइगु अवस्था मदुनि। तर जि स्कूलय् म्यूजिक टिचर जुयाः व बहनी रेष्टुरेण्टय् गजल हालाः जिं थःत संगीत क्षेत्रय् हे पूर्णरुपं पानाच्वनागु दु ।

More Stories Like this