थौं माओवादी-एमाले वार्ता

बांलाःगु लिच्वः पिहां वइ थें च्वं : नारायणकाजी

येँ (सन्ध्या टाइम्स)/राजनीतिक गतिरोध चीकेगु निंतिं थौं सुथय् एमाले व माओवादी दथुइ जूगु सहलह सकारात्मक जूगु टिप्पणी माओवादी उपाध्यक्ष नारायणकाजी श्रेष्ठ (प्रकाशं) यानादीगु दु ।

न्हू बानेश्वरय् च्वंगु माओवादीया छम्ह कार्यकर्ताया छेँय् जूगु सहलह लिपा पत्रकारत लिसे खँ ल्हासें उपाध्यक्ष श्रेष्ठं उगु टिप्पणी यानादीगु खः। वय्कलं थौंया वार्ता सकारात्मक जूगु खँ कनादिसें थुकिं आः याकनं हे राजनीतिक निकास पिहां वइगु आशा नं प्वंकादिल ।

पत्रकारतय्सं न्यंगु छगू न्ह्यसःया लिसः बिसें वय्कलं वार्ता सहमतिया न्ह्यःने थ्यंगु दु उकिं वार्ता उपलब्धीमुलक जूगु दु धयादिल। वार्ताया झ्वलय् माओवादीं न्ह्यब्वःगु मंकाः संकल्प प्रस्तावयात कयाः नं उगु वार्ताय् सहलह जूगु खः।
बैठकय् माओवादी नेतृत्वया सरकारं तत्कालिन प्रधानसेनापति रुक्मांगद कटवालयात बर्खास्त यायेत बिउगु निर्देशनयात राष्ट्रपतिं थमौती याःगु खँयात गुकथं संवोधन यायेगु धइगु बारे सहलह जूगु खः ।

सूत्रया कथं थौं च्वंगु बैठकय् राष्ट्रपतिया बारे अप्रत्यक्ष रुपं संवोधन यायेगु खँय् निगू पार्टीया दथुइ सहमति जूगु दु। सहमति कथं मंकाः संकल्प प्रस्तावय् उकियात न्ह्यमथँसें राष्ट्रपतिया क्षेत्राधिकार किटान यायेगु लागिं संविधान हे संशोधन यायेगु खँय् नं सहमति कायम जूगु खः ।

उगु सहलह ज्याझ्वलय् माओवादीपाखें वरिष्ठ उपाध्यक्ष डा. बाबुराम भट्टराई व नारायणकाजी श्रेष्ठं ब्वति काःगु खःसा एमालेपाखें सचिव युवराज ज्ञवाली व भरतमोहन अधिकारीं ब्वति काःगु खः ।

थौं हे एमालें कांग्रेसलिसे नं थ्वहे विषययात कयाः सहलह न्ह्याकीगु ज्याझ्वः दु। अथे हे थौं हे स्वंगू दलया कार्यदलया बैठक नं च्वनेत्यंगु दु। कांग्रेसया संसदीय ज्याकू सिंहदरवारय् उगु बैठक च्वनी ।

उखे दलतय् दथुइ वार्ता प्रक्रिया न्ह्यानाच्वंगु कारणं प्रधानमन्त्री माधव नेपालं थौं थःगु फुक्कं राजनीतिक ज्याझ्वःत स्थगित यानादीगु दु ।

मेखे स्वंगू दलं तयार याःगु संकल्प प्रस्तावया मस्यौदायात राष्ट्रपति डा. रामवरण यादवं असन्तुष्टि प्वंकूगु खँ सीदुगु दु। संकल्प प्रस्तावय् 'प्रधानसेनापति प्रकरणय् राष्ट्रपतिपाखें चायेकं मचायेकं जूगु गल्तीयात संसदं भिंकेत निर्देशन बिया' धकाः च्वयातःगु बुँदायात कयाः राष्ट्रपतिं असन्तुष्टि प्वंकूगु खँ सूत्रं धाःगु दु ।

थौं च्वनीगु स्वंगू दलया बैठकय् थुकियात कयाः नं सहलह जुइगु खँ धाःगु दु। छखे माओवादीं सकल्प प्रस्तावय् राष्ट्रपतिया पलाः बारे गुगुं नं कथं खँ न्ह्यथनेमाःगु माग यानाच्वंगु व मेखे राष्ट्रपति स्वयमं उकी असन्तुष्टि प्वंकेवं आः छु यायेगु धकाः स्वंगू दल दथुइ हानं सहलह जुइगु खँ धाःगु दु ।