फिल्मय् ग्ल्यामर

विजयरत्न

ग्ल्यामरया परिभाषा थुलि तब्याः कि उकियात छुं नं खँग्वलं चिनाः चिइ फइमखु । पाश्चात्य संसार व झीगु हलिमय् थुकिया अर्थ बिस्कं बिस्कं हे दु । साधारण रुपं धायेगु खःसा ग्लयामरयात सुन्दरताया प्रदर्शन धकाः धायेमाःसा थन थुकियात गुलि फु उलि म्ह ब्वयेगुयात कयातःगु दु । 'धड्कन' नांयागु छगू न्हूगु नेपाली फिल्मयात आःतकया दकले ग्ल्यामर दुगु फिल्म धकाः बय्बय् याना वयाच्वंगु दुसा थ्व फिल्म स्वयेबलय् थुकिया निम्ह हिरोनीत रेखा थापा व अरुणिमा लम्सालं पतिहाकःगु वसः पुना थःथगु म्हया थीथी ब्व ब्वयाच्वंगु खनेदइ । थ्व फिल्म म्हिताः निखिल उप्रेतीया बच्छि ईज्जत लुटे जुल धईगु चर्चा जूगु खः । उलि जक मखसें निखिलया थः तिरी मय्जुलिसे नं ल्वापु तकं जुल धइगु न्यनेदु । निखिल उप्रेती थःम्हेसिनं हे धाःकथं 'धड्कन'य् ग्ल्यामर सिनय् म्हिताः बच्छि ईज्जत वनसा 'अभिमन्यू' फिल्मय् अज्याःगु लुइ अरुणिमा लम्साललिसे ज्या याना पुरा हे ईज्जत वंगु थें जुयाच्वंगु दु हं । अझ 'धडकन'या इलय् तिरिमय्जुलिसे जूगु ल्वापु 'अभिमन्यू'तक थ्यंबले पारपाचुकेतक थ्यनीगु जुल धकाः ख्याः याना च्वंम्ह एक्शन स्टार निखिल उप्रेतीया थ्व न्हूगु फिल्मय् अरुणिमा लम्साल, पूजा प्रधान व जेनी कुँवरलिसे ग्ल्यामरं जाःगु लु दुथ्याना च्वंगु दु ।

जेनी कुँवर थ्व सिबें न्हापा 'बज्रपात'य् नं अज्याःगु हे लु बिइ धुंकूगुदु । फिल्मयात माःसा माक्व अङ्ग ब्वयेत तयार धकाः धया जूम्ह जेनी कुँवरयात अभिनय प्रतिभाय् क्वह्यंम्ह जूगुलिं थज्याःगु ज्या याना जूसां थःगु अस्तित्व ल्यंकेगु कुतः यानाच्वंम्ह धकाः धाइ । नेपाली फिल्मय् थज्याःपिं हिरोनीत दुहां वसांनिसें हिरोनीतसे फिइगु वसःत म्हो जुयावंगु दु अले चीपा जुयावंगु दु । रेखा थापाया आगमनं हिरोनीतय्त ग्ल्यामरं जायेकेगु त्वह चिना चीपाःगु वसः पुंकेगु चलन अप्वया वःगु खः । आः ला रेखा थापां गुगु फिल्मय् गुलि अप्वः वसः पूंगु दु धकाः हे धाये थाकुइ धुंकल ।

छगू इलय् गौरी मल्लं क्वब्वालखय् झरनाय् म्वःल्हूगु लु तयातःगु हुनिं 'लोभी पापी' नांयागु फिल्म तसकं विवादास्पद नं जूगु खः । 'कस्तुरी' फिल्मय् चुप्पा व 'कसमू' फिल्म खुसि सिथय् बीना बुढाथोकीं लखं प्याःगु वसः पुनाः अभिनय याःबलय् नं उत्तिकं हे विवाद ब्वलंगु खः । वीना बुढाथोकीं ला निर्देशक दीपक रायमाझीं थःयात मसीक झङ्गः लाना अज्याःगु लु दुथ्याकूगु धका द्वपं बिलसा 'महामाया' फिल्मय् नं थःत झंगः लाना चुप्पाया लु तःगु धकाः करिश्मा मानन्धरं द्वपं ब्यूगु खः । न्हापा न्हापा जूसाः थथे अङ्ग ब्वयेगु व ग्ल्यामर ब्वयेगु ज्यापाखें हिरोनीत बचे जुइत कुतः याइगु खःसा आः वयाः अथे मजुइ धुंकल । थ्व पलाः न्ह्याः वनाः सायद छुं ई लिपा थन नं मल्लिका शेरावत थेंज्याःपिं हिरोइनत जकं पिहां वइगु खःला धकाः धुकुमां यायेथाय् यक्व हे दु । धात्थें धायेगु खःसा निर्देशक दीपक रायमाझीयात फिल्मय् ग्ल्यामरयात अप्वः थाय् बिइगुलिइ न्ह्यलुवाः धका धायेमाः । वय्कलं 'कसम'या खँ च्वये हे न्ह्यथने सिधलसा 'अंगालोमा' य् मीरा केसी व 'यो मायाले लौन सतायो' व 'पराई घरू' य् जल शाहयात नं ग्ल्यामरं जाःगु लु क्यनेगु त्वह चिना म्ह ब्वयेके ब्यूगु खः । मीरा के।सी।यात ला मछाः मजूम्ह मिसाया द्वप लानाः मेपिन्सं सुनां ज्या हे मबिल तर जल शाह मय्जुं धाःसा थःगु ईमेजयात ग्ल्यामस्र ईमेज धकाः धयाः थुखेपाखे पलाः क्वातुकेत ताःलात । फिल्मय् ग्ल्यामरं जायेकेत म्ह ब्वयेम्वाः धइगु खँया दसु कथं निरुता सिंह मय्जुं थःगु न्हाय् धस्वाका मेमिन्त हाथ्या बियाक्यंगु खँ थन लुमंके बहः जू ।

More Stories Like this