जागरण मञ्चया तुच्चा ज्याझ्वः

नेपाल स‌ंवत् ११३० न्हूदँया लसताय् नेवाः जागरण मञ्चं शनिवाः छगू भिन्तुना तुच्चा ज्याझ्वः यात । उगु ज्याझ्वलय् एनेकपा (माओवादी)या वरिष्ठ न्वकू नारायण काजी श्रेष्ठ 'प्रकाशं' विक्रम संवत्यात विस्थापित यानाः नेपाल स‌ंवत्यात छ्यलाबुलाय् हयेमाःगु व व्यवहारिक कथं छ्यलेत छुं नं समस्या दुसा सम्बन्धित विज्ञत दुथ्याकाः छगू कमिटी दयेकेमाःगु खँ कनादिल ।

ज्याझ्वलय् नेवाः देय् दबूया पुलांम्ह नायः मल्ल के. सुन्दरं नेपाल संवत्यात राष्ट्रिय संवत् कथं मान्यता ब्यूसां नं व्यवहारिक कथं मछ्यःतले थुकीया महत्व मदइगु खँ धयादिसें नेपाल सरकारया सूचना तथा संचार विभागं नेपाल संवत् न्हूदँया लसताय् नेपाल संवत् दुगु नगुमा पिथनेमाःगु धेवा(सिक्का)य् नं नेपाल संवत् छ्यलेमाः धयादिल । वयेकलं संसदया ज्याखँय् नं तिथि च्वयेगु इलय् नेपाल संवत् छ्यलेगु नितिं माग यानादिल । अथेहे वयेकलं न्हूगु संविधानय् देशया सांस्कृतिक निति गज्याःगु जुइगु खः व नं स्पष्ट न्ह्यथनेगु निंतिं सम्माननीय सभाध्यक्ष सुवास नेम्वाङ्गयात सक्रिय भूमिका म्हितादीत नं इनाप यानादिल ।

थ्वहे झ्वलय् मू पाहाँ नापं सभाध्यक्ष नेम्वाङ्गं नेपाल संवत् सम्बन्धि तःगु मागय् थःगु गम्भिर ध्यानाकर्षण जूगु न्ह्यथनादिल । नापं प्रधानमन्त्री माधवकुमार नेपालं थुकिया नितिं उच्च स्तरिय कमिटी नीस्वनेगु प्रतिवद्धता प्वंकादीधुंकूगुलिं याकनं हे उगु कमिटी दयेकेगु खँय् सकसियां ध्यान बीमाःगु धयादिल । सभाध्यक्ष नेम्वाङं देसय् न्हूगु संविधान इलय् हे दयेकी वा मदयेकी धैगु आशंका ब्वलनाच्वंगु खँ धयादिसें देय्या मू मू दलत दथुइ उच्च स्तरीय सहमति दत धाःसा संविधान इलय् हे च्वये सिधइगु व थुकीया नितिं दल त गम्भिर जुयाच्वंगु विश्वास नं प्वंकादिल ।

मञ्चया संयोजक सुजिव वज्राचार्यया सभापतित्वय् न्ह्याःगु ज्याझ्वलय् सभासद् हिसिला यमि, कृष्ण गोपाल श्रेष्ठ, साहित्यकार लक्ष्मण राजवंशी, पत्रकार भाष्करराज राजकर्णिकर, चेम्वर अफ कमर्शया नायः सुरेन्द्रवीर मालाकार, नेपाः राष्ट्रिय पार्टीया नायः डा. केशवमान शाक्य, डा. महेशमान श्रेष्ठ नापं आपालं भाषाह्यमि व कार्यकर्तातय्गु उपस्थिति दुगु खः ।

ज्याझ्वलय् मञ्चया संयोजक बज्राचार्यं मूपाहाँ नेम्वाङयात शंखधर साख्वाःया मूर्ति व न्हूदँ ने.सं. ११३० या नगुमा लःल्हानादील ।

More Stories Like this