थीथी पार्टीया नेवाः सभासद्त छगू हे थासय्

नेवाः स्वायत्त राज्यया निंतिं नीछम्ह नेवा: सभासद्तय् मंकाः प्रतिवद्धता

सभासद्तय्गु बिचाः थीथी जुइफु । थीथी पार्टीया थःथःगु हे सिद्धान्त दयेफु तर छगू आज्जु वा विषयया नितिं थीथी पार्टीया सभासद्त छथाय् च्वनाः मंकाः प्रतिबद्धता यायेफु धैगु दसि थौ येँया राष्ट्रिय सभा गृहस जूगु ज्याझ्वलय् जुयाब्यूगु दु । नेवाः स्वायत्त राज्य पलिस्था यायेगु निंतिं थौं एनेकपा (माओवादी), नेकपा (एमाले), नेपाली कांग्रेस, नेपाः राष्ट्रिय पार्टी नापं थीथी पार्टीया सभासदपिंसं मंकाः प्रतिवद्धता प्वंकल ।

उगु ज्याझ्वःस माओवादीया न्वकू नारायण काजी श्रेष्ठ 'प्रकाश', हिसिला यमि, हितमान शाक्य, दीलिप महर्जन, उमा कपाली, राजकाजी महर्जन, महालक्ष्मी श्रेष्ठ लिसें झिम्ह सभासदत अथेहे एमालेया मंगलसिद्धि मानन्धर, सपना मल्ल प्रधान लिसेंया सभासदत, कांग्रेसया तीर्थराम डंगोल, नेपाः राष्ट्रिय पार्टीया बुद्ध साय्मि, बहिरा सांसद राघववीर जोशी लिसेंया सभासदतय्सं मंकाः प्रतिबद्धता प्वंकूगु खः ।

ज्याझ्वलय् नेपाः राष्ट्रिय पार्टीया बुद्ध साय्मिं राजनैतिक अधिकार मदयेकं भाषा, संस्कृति, जातिया छुं नं अधिकार काये मफइगु खँ धयादिल । वयेकलं नेवाः स्वायत्त राज्य पलिस्थाया निंतिं दक्व पार्टीया सभासदपिंसं प्रतिबद्धता प्वंकूगु लसताया खँ खः धयादिल । एमालेया सभासद नापं अधिवक्ता सपना मल्ल प्रधानं नेपालभाषा नापं मेमेगु भाषायात अझ नं सिस्टमेटिक ढंगं राष्ट्रिय भाषा कथं मान्यता मब्यूनिगु खँ धयादिसें संघियताया खँय् जनमानसय् अझ नं ग्यांचिकु व शंकाया मानसिकता दुगु धयादिल । वयेकलं संघियतायात गुकथं संविधानय् रुपान्तरण यायेगु व व्यवहारिक कथं यायेगु छगू हाथ्या जूगु खँ धयादिल । 'एक प्रदेश एक मधेश' थें जाःगु मुद्दां यानाः जनताया दथुइ संघियतां विखण्डन हइगु जकं मखुला धैगु ग्याचिकु दनिगु व हिंसाया राजनीति ब्वलनीगु मानसिकता दयाच्वंगु खँ धयादिसें वयेकलं संघियताया बारे जनमानसय् चेतना थनेमाः धयादिल । वयेकलं संघियता शक्तिया बाँडफाँड, विकेन्द्रीकरण व आदिवासी व जनजातिया म्हसीका, विभेदया अन्त्य व समानताया लडाई खः धैगु थुइकेमाःगु खँय् बः बियादिल ।

ज्याझ्वलय् माओवादीया सभासद हिसिला यमिं संघर्ष मयायेकं अधिकार काये मफइगु खँ न्ह्यथनादिसें थःपिनिगु पार्टीं जनयुद्धया ईलं निसें जातिय व क्षेत्रीय अवधारणा कथं संघियताय् वनेधुंकूगु खँ धयादिल । जनयुद्धया ईलय् मगरात स्वायत्त राज्यया निंतिं अभ्यास यानागु खँ कनादिसें वयेकलं स्वायत्त राज्यं देय्या आर्थिक अवस्था सबल यायेत ग्वाहालि जुइगु खँ धयादिल । अथेहे माओवादी सभासद हितमान शाक्यं नेवाः स्वायत्त राज्य मवतले संघर्ष यानाच्वेमाःगु नापं थुकिया निंतिं सभासदतय्सं जक मखु सकल नेवाःतय्सं सभासदतय्त घ्वाना च्वनेमाःगु खँ धयादिल । ३२ म्ह नेवाः सभासदत मध्ये २१ म्हेस्यां जक ल्हाःचिं तःगुलिइ ल्यंदनिपिं सभासदपिंत नं प्रतिबद्धताया निंतिं ज्या याय्मानीगु खँ वयेकलं धयादिल ।

अथेहे एमालेया सभासद मंगलसिद्धि मानन्धरं नेवाः स्वायत्त राज्य दयेके मज्यूगु व स्वनिगःयात केन्द्रपाखें शासित जुइमाः धका वयाच्वंगु खँया विरोध यानादिसें संघियता मबीगु निंतिं आदिवासी जनजाति दथुइ ल्वाकेगु नापं विखण्डन जुइगु, थिकेगु व्यवस्था, प्रशासनिक रुपं जक विकेन्द्रीकरण वा भौगोलिक संरचनायात आधार दयेका संघियता वनेगु आदि खँ हयाः जनजातितय्त अलमल यायेगु व विचलन हयेगु कुतः जुयाच्वंगु खँ धयादिल । अथेहे वयेकलं नेवाःतय्सं संघियताया खँ ल्ह्वनेगु ईलय् नां, लागा आदि खँत छगू हे भाय् कथं जुइमाःगु नं धयादिल । वयेकलं थन जक प्रतिबद्धता मखु निरन्तर रुपं दबाव बीगु ज्या नं जुइमाः धयादिसें नेवाःत छप्पँ जुइमाःगु खँय् बः बियादिल ।

अथेहे कांग्रेसया तीर्थराम डंगोलं राज्य पुर्नसंरचना समिति संविधान सभाया निंतिं छगू तःधंगु हाथ्या जुयाच्वंगु खँ धयादिसें संघियता वनेगु थ्व छगू बांलाःगु अवसर नं खः व थुकिया उपयोग यायेमाःगु खँ धयादिल । वयेकलं राजनैतिक, आर्थिक कथं दमन जूगु व सामाजिक रुपं बहिष्कृत जूगुलिं हे आदिवासी जनजातित संघियताय् वनेत बाध्य जूगु खँ धयादिल । नापं वयेकलं नेवाःत छप्पँ जुइमाःगु जक मखुसें सुंयात नं विभेद मयासें सकसितं कःघाना यंकेफूम्ह नेवाः नेतृत्वया नं आवश्यकता जूगु धयादिल । ज्याझ्वलय् बहिरा सभासद राघववीर जोशी नं थ:गु नुगः खँ प्वंकादीगु खः ।

नेवाः स्वायत्त राज्य संघर्ष समितिया छ्याँज्ये नरेश ताम्रकारं न्ह्याकादीगु उगु ज्याझ्वलय् मुँज्या नायः नापं समितिया नायः नरेन्द्र भक्त हाडां नेवाः स्वायत्त राज्य धकाः संविधानय् न्ह्यथनेमाःगु व समानता व न्यायया निंतिं नेवाः स्वायत्त राज्य अत्यावश्यक जूगु खँ धयादिल । वयेकलं थीथी पार्टीया सभासदत छथाय् च्वनाः स्वायत्त राज्यया निंति प्रतिबद्धता प्वंकूगु तसकं लसताया खँ जूगु कनादिसें थ्व नेवाः एकताया दसि नं जूगु खँ धयादिल । ज्याझ्वलय् आपालं नेपालभाषाया न्ह्यलुवातय्गु उपस्थिति दुगु खः ।

More Stories Like this