पार्टीतय्सं गबलय् यायेगु तुच्चा ?

नेपाःया राजनीतिइ मोहनि व स्वन्तिया तुच्चा ज्याझ्वः यानाः थवंथवय् स्वापू क्वातुकेगु ज्या राजनीतिक पार्टीतय्सं तच्वयेका हःगु दु। न्हापा न्हापा थज्याःगु ज्या नेपाली कांग्रेसं जक याइगु खःसा आः थ्व एमाले जुयाः छुं दँ न्ह्यः तिनि खुल्ला जूगु माओवादीं नं शुरु याना हःगु दु। तर माओवादीं मोहनिया लसताय् तुच्चा मयासे नेपाल संवत्या न्हूदँया लसताय् तुच्चा यानाः थःत न्हू नेपाः दयेकेत वयागु न्हू बिचाःया पार्टी खः धकाः प्रमाणित याना बिउगु दु। नेपाल संवत्या न्हूदँया लसताय् तुच्चा यानाः माओवादीं थःपिं न्हूगु खँ स्वीकार यायेत मग्याइपिं खः धकाः नं बांलाक हे क्यना बिउगु दु। मोहनिया लसताय् तुच्चा ज्याझ्वः यायेगु थौंया इलय् मिले मजूगु ज्या जुइधुंकल। मोहनि धइगु हिन्दूतय्सं माने याइगु नखः खः। आः नेपाः न्हापा थें हिन्दू अधिराज्य मखयेधुंकल। नेपाः छगू धर्म निरपेक्ष राष्ट्र खः धकाः संविधानय् हे उल्लेख जुइधुंकल। थज्याःगु इलय् देय्या सकलें जनताया लागिं राजनीति यायेमाःपिं राजनीतिक पार्टीतय्सं मात्र हिन्दूतय्गु जक नखःया लसताय् तुच्चा यायेबलय् अन दुने च्वंपिं मेमेगु जाति व धर्मया कार्यकर्ताया अपमान जू वनीगु खनेदु। धर्म निरपेक्ष नेपाः दुने हानं न्हापा थें हे मोहनिया लसताय् राजनीतिक पार्टीतय्सं तुच्चा याःगुलिं थुपिं अझ नं देशय् वःगु हिउपाःलिसे आत्मसात यानाः न्ह्याः वने मफुनि धइगु खँ क्यना बिउगु दु। बरु माओवादीं नेपाल संवत्या न्हूदँय् तुच्चा यानाः नेपाल संवत्यात मान्यता बिउगु जक मखु नेपाःया थःगु हे नामं स्वनातःगु संवत्यात मान्यता बीगुया अर्थ राष्ट्रवादी बिचाःयात कःघायेगु खः धकाः नं क्यना बिउगु दु। थ्व सकस्यां नाला कायेबहः जू ।

More Stories Like this