छठ लिपा आन्दोलन
निन्हुया दुने सहमति पिकायेत माओवादीया ख्याच्वः
येँ (सन्ध्या टाइम्स)/यदि थ्वहे वइगु निन्हुया दुने राजनीतिक निकास पिहां मवल धाःसा छठ पर्व क्वचायेवं आन्दोलन न्ह्याकेगु खँ माओवादी उपाध्यक्ष डा. बाबुराम भट्टराईनं धयादीगु दु ।
थौं सुथय् येँ क्षेत्र नम्बर २ पाखें ग्वसाः ग्वःगु कौला ज्याझ्वलय् न्ववासें वय्कलं उगु खँ धयादीगु खः।
'कन्हय् व कंस तकया दुने राजनीतिक सहमति मजुल धाःसा आन्दोलन न्ह्याकेगु जुइ' डा. भट्टराईनं धयादिल।
राजनीतिक सहमतिया निंतिं माओवादीं क्यनाच्वंगु लचकतायात सत्ताधारी पार्टीतय्सं कमजोरी तायेकाच्वन धासें थुकथं हे मेगु पार्टीतय्सं व्यवहार यानाच्वनेगु खःसा निर्णायक आन्दोलनया विकल्प मदुगु खँ वय्कलं धयादिल।
छुं देशीविदेशी शक्तिया कारणं नं राजनीतिक सहमति कायम जुइ मफयाच्वंगु खँ कनादिसें वय्कलं याकनं हे राजनीतिक सहमति कायम यायेमाःगु पक्षय् थःपिं दु धयादिल।
उखे माओवादीया हे मेम्ह उपाध्यक्ष नारायणकाजी श्रेष्ठ (प्रकाशं) नागरिक सर्वोच्चताया निंतिं थःपिंसं गुगुं नं कथंया सम्झौता याये मफइगु खँ धयादीगु दु। थौं सुथय् नेपालगञ्ज विमानस्थलय् पत्रकारत लिसे खँ ल्हासें वय्कलं उगु खँ धयादीगु खः ।
वर्तमान समस्या ज्यंकेगु निंतिं थःपिं लचक जुइत तयार दुगु खँ कनादिसें राष्ट्रपतिया पलाःया बारे धाःसा संकल्प प्रस्तावय् खँ दुथ्याकेमाः धयादिल ।
उखे राजनीतिक सहमति कायम यायेगु निंतिं थौं स्वंगू दल सम्मिलित कार्यदलया बैठक च्वनेत्यंगु दु। एमाले संसदीय दलया ज्याकू सिंहदरबारय् च्वनीगु उगु बैठकय् स्वंगुलिं पार्टीं राष्ट्रपतिया पलाः बारे थःपिनिगु स्पष्ट धारण तइगु खँ धाःगु दु। राष्ट्रपतिया पलाः बारे संकल्प प्रस्तावय् खँ दुमथ्याकुसे गुकथं संवोधन याये फइ धइगु बारे नं थौंया बैठकय् सहलह जुइगु खँ धाःगु दु ।
स्वंगू दलया बैठकं तयार याःगु संकल्प प्रस्तावयात कयाः शीर्ष नेतातय् दथुइ सहलह यानाः उकियात अन्तिम रुप बीगु खँ धाःगु दु। थौंया बैठकय् एकीकृत नेकपा (माओवादी) पाखें देव गुरुङ, कांग्रेसपाखें अर्जुन नरसिंह केसी व एमालेपाखें युवराज ज्ञवालीपिंसं ब्वति काइगु खँ धाःगु दु ।
माओवादी व सत्तारुढ एमाले-कांग्रेस स्वंगुलिं पार्टी राष्ट्रपति बारे थःपिनि अडानय् कायम हे जुयाच्वंगुलिं यानाः राजनीतिक निकास पिहां मवयाच्वंगु खःसा स्वंगू दलया थौं च्वनीगु बैठकं धाःसा निकास पिकायेफुगु आशा एमालेया नेता ज्ञवालीं प्वंकादीगु दु। वय्कलं धयादिल, 'थौं सहमति जुइ फइगु सम्भावना दु ।'
