संवत्या आन्दोलन: गन थानाच्वन ?

थौं नेपाल संवत् ११३० न्हूदँ। खतुं हरेक संवत्या न्हूदँयात मनूतय्सं हनीगु ला छगू लसताया रुपय् खः। तर नेपाल संवत् छगू हे जक विश्वया छगू अज्याःगु संवत् जुयाच्वंगु दु गुकियात मनूतय्सं आन्दोलनया रुपय् हनेगु याइ। नेपाल संवत्यात राज्य सत्ताया जिम्मेवार मनूतय्सं नं ग्रहण याना धकाः सगौरव घोषणा याःगु कारणं आः थुकियात नं आन्दोलन मखु लसताया रुपय् हने फइगु जुल धकाः छुं दँ न्ह्यः आशा याःगु खः। तर राज्य सत्ताया जिम्मेवार पदाधिकारी व राजनीतिक नेतातय्सं म्हुतुं छता धयाः ज्यां मेगु हे क्यना हःगु खंबलय् नेपाल संवत्या न्हूदँ हानं आन्दोलनया हे स्वरुपय् लिहां वंगु दु। थ्व संवत्यात राष्ट्रिय मान्यता बीगुया अर्थ थुकिया प्रणेतायात राष्ट्रिय विभूति घोषणा यायेगु, नेपाल संवत्या साल छगू राष्ट्रिय न्हिपती च्वकेगु, नेपाल संवत्या न्हूदँय् प्रधानमन्त्रीं न्ववायेगु वा सरकारं थुकियात कयाः आयोग गठन याये धकाः आश्वासन जक बीगु मखु धइगु खँ संवत्या आन्दोलनकारीतय्सं आः वयाः थुइका हःगु दु। वास्तवय् नेपाल संवत्यात राष्ट्रिय मान्यता बीकेगु आन्दोलन अझं क्वचाःगु मदुनि बरु थुकियात मेगु रुपं न्ह्याकेमाःगु आवश्यकता वयाच्वन धइगु खँ आः वयाः वाःचायेका हःगु दु। देशय् दक्व राजनीतिक पार्टीतय्सं नेपाल संवत् नेपाःया राष्ट्रिय संवत् जूगु कारणं थुकियात सरकारी मान्यता बीमाः धकाः सिद्धान्ततः स्वीकार यायेधुंकूगु दु। तर मान्यता धाःसा बियाच्वंगु मदु। थुकियात मान्यता बीत गन समस्या वयाच्वन? थ्व खँ नं आन्दोलनकारी सिल, न राज्यं धाये फत। झीसं आशा याये, न्हूदँ ११३० थ्व अन्यौलयात चीकाः राष्ट्रिय मान्यता कायेत ताःलाइ ।

More Stories Like this