न्हापा न्हापाया स्वन्ति नखः

सुनिता मानन्धर

जिमि बाज्यां मुलय् तयाः कनातःगु बाखं

जिगु नां लक्ष्मी मानन्धर खः। जि ७० दँ दत। जिगु छेँय् येँय् महानगरपालिका वडा नं १९ चसान त्वालय् खः। झी नेवाः यक्व हे नखःचखः हनेमाः। झीसं तःजिक हना वयाच्वनागु नखः मध्ये स्वन्ति नखः नं छगू खः ।

स्वन्ति नखः न्यान्हु तक हनीगु नखः खःसा तसकं लिमलाइगु दिं धइगु स्वन्हु खः। अथे धयागु लक्ष्मीपुजा, म्हपुजा व किजापुजा। थौंकन्हय् नखः हनेगु स्वयां यक्व हे पाय् धुंकल ।

अबलय् जिमि जहानया खुम्ह दाजुकिजापिं सकलें नापं तिनि। सकलें सगोलय् जूगुलिं नखःया वसः छकः हीत नं तसकं थाकु। त्वाःयापिं सकसिनं निम्ह द्यः खनिनं अझ वसः ही मसिधनी ला धकाः हाली, पिंलिपिं सकलें जानाः वसः हिउसा स्वन्हु बी ।

लक्ष्मीपुजाया न्हिकुन्हु छेँ छखां बँ इलाः नीसी यायेमाः। सालय् नं ज्या यायेमाः। सुथसिया स्वताः इलय् दनाः तू हायाः, छेँय् सुचुकुचु यानाः ज्वरे यायेमाः। सालय् चिकं दुपिं जूगुलिं जिमि न्हापांनिसें छेरिनिसे बैगःथ्यंकं पाल्चा हे च्याकेगु। थौंकन्हय् थें थाय्थासय् पाल्चा न्यायेगु नं मदु। ख्वपय्तसें खमूली तयाः मी हइगु पाल्चा न्यायेमाः। लक्ष्मीपुजा यायेत चिनियाम्ह किसिचा मदयेक मगाः। छेँजः सकसित छम्ह छम्ह थयेक चिनियाम्ह किसिचा न्याना हइ।
लक्ष्मीपुजा यायेत स्वनातःगु ला, स्वनाःगु जाकि, ख्वःचासिमि नापं मेगु घासात तयाः प्यता घासा दयेकी। लक्ष्मी मरि नं मदयेकं मगाः। हलू लप्ते भ्वय् ब्वः नाप ख्येंसगं ज्वलं नापं हलुवाइ मरि छता नं तइ। न्हिनय् सकलें जानाः स्वांमाः हनी। मूलुखां निसें बैगःया झ्यालय् थ्यंक झःझः धायेक स्वांमां तइ। बहनी जुलकि थाकुलिं सेफय् द्यः पुज्याइ। लक्ष्मी द्यः पुज्यातकि ध्यबा पित बीमजिउ धकाः सालय् ज्या याइपिं सेँय्तय्त न्हापा हे ध्यबा बी। साः ज्याया कालबिल यायेमाःगुलिं कन्हय् कुन्हु हे स्वां नं क्वकाइ।
कन्हय् कुन्हु स्वां क्वकाये स्वयाः न्ह्यः समय् ज्वलं ज्वरे याइ। स्वां क्वकाःगु प्रसाद कथं उकी तनाः सकसितं समय् नकी। छेँया सकलें मस्तय्त चिनियाम्ह किसिचा छम्ह छम्ह बी। चिनियाम्ह किसिचा ल्हाःतय् लायेवं व ज्वनाः न्हिछि सकलें लय्लय् तायाच्वनी ।

व खुन्हु बहनी म्हपूजा झन नं लिमलाः। वः छकः नीत नं निघौ स्वघौ माः। ततःग्वःगु भ्यगतं निथला माय् वः व मू वः नीमाः। जिं बांलाक माय् नी मसःगुलिं जिमि दराभतं निना बी। जिपिं पिलिपिनि ज्या ब्वथला ज्या याये ।

म्हपुजा कुन्हु सुथ न्हापां दनाः सकसिनं म्वः ल्हुइमाः। म्वः मल्हुसे म्हपुजा याये मजिउ धाइ। वकन्हु सिकियात नं तयेमाःगुलिं नीसि यानाः ज्वरे यायेमाः। जिपिं खुम्ह दाजुकिजाया पीम्ह (४० म्ह) मस्त दु। म्हपुजाया मन्दः च्वयेत सकलें मस्त मुनी। बैगलय् झ्वःलिक थःगु थाय् कथं लंगुर बुर्जाया बुट्टा कथं (पान, चिर, सुरत आदिया आकारं) ल्हातं मन्दः च्वइ। उकी छाय्पि माःगु सकतां ज्वलं तयाः बांलाकी। थाकुलि नकिं नं दकलय् न्हापा भुतू ज्वलं ( भुतू, तुफि, हासा, ल्वहंमा) यात द्यः पुज्याइ। अनलि झ्वःलिक म्हपुजा याइ। दकलय् लिपा न्हापा याये क्वचाःम्हेसिनं थाकुलिया नं म्हपुजा यानाबी ।

व कुन्हु सकसितं थयेक छपाः छपाः देमा माः। म्हपुजा यायेधुंकाः मन्दः द्यःने तयाः भ्वय् नयेमाः। वकुन्हु चिप अथें तयातःसा कन्हय् लुँ जुइ धाइ। उकी वकन्हु चिप अथें तयाः तयेमाः धाइ। कन्हय् कुन्हु मन्दःनापं स्यंकाः चिप सिली।
वयां कन्हय् कुन्हु किजापुजा सकसियां दाजु किजापिं छेँय् वइ। दकलय् न्हापा किजापिंत कौला याइ। अनंलि मन्दः च्वयातःथाय् फ्यतुकाः किजापुजा याकी। न्हूम्ह भम्चा जूसां किजा पर्सि, गा, लँ यानाः छज्वलं बी। लिपा जुलकि पर्सि छत्वाः अथवा लँ कापः छकू जक बी। जिमि मस्तय्त नं दाजुकिजाया मस्त नापं किजापुजा याका तयागु। किजापुजा कुन्हु जिमि दराभत किजापुजा यायेमाःपिं सकलें मस्तय्त म्हतिं छर्का छर्का दां थइगु कथं ध्यबा इनाबी छर्का दां कायेत सकसिनं न्ह्यइपुसे च्वंक किजापुजा याइ। किजापुजा यायेबलय् ग्वाः व मसिप्वः बीगु चलन जिमि न्हापांनिसें हे दु।
किजापुजाया कन्हय् कुन्हु दाल्चाय् तया थःछेँय् तःसि तःवनेमाः। किजापुजा कुन्हु किजां बिउगु पर्सि सिनाः तःसि तःवनी। तःसि तःवनकि थः छेँय् जा नयाः वयेगु। अबलय् अपाय्धंगु जः नापं मिखा प्वाः चासांनिसें ज्या यानाः नखः हनेमाःसां तसकं न्ह्यइपुसे च्वं ।

More Stories Like this