न्हूदँय् स्वशासनया नारा
बसन्तपुली तःधंगु र्याली व सभा
राष्ट्रपति व प्रधानमन्त्रीपाखें तुच्चा
येँ (सन्ध्या टाइम्स)/नेपाल संवत् ११३० न्हूदँया लसता थौं देय्न्यंकं थीथी ज्याझ्वः यासें तःजिक हनाच्वंगु दु। थौं सुथय् स्वनिगःया येँ, यल, ख्वप नापं पिने जिल्लाय् नं भिंतुना र्याली, सभा व तुच्चा ज्याझ्वःत न्ह्यानाच्वंगु दु ।
न्हूदँया मू ज्याझ्वः कथं थौं येँया बसन्तपुली नेपालभाषा मंकाः खलः न्हूदँ समारोह समिति - ११३० या ग्वसालय् छगू तःजिगु सभा यायेत्यंगु दु। सभाय् मू पाहां कथं प्रधानमन्त्री माधव कुमार नेपालं ब्वति कासें संवोधन यानादीगु ज्याझ्वः दु ।
सभा न्ह्यः बसन्तपुलिं छगू तःधंगु सांस्कृतिक ज्याझ्वः न्ह्याइ। उकी थीथी खलः पुचःतय्सं थःपिनि ब्यानर नापं ब्वति काइ। येँया थःने व क्वःने चाःहिलाः र्याली बसन्तपुली छगू सभा यासें क्वचाइ। र्यालीइ आपालं मनूतय्सं ब्वति काइ। सभाय् थीथी सिरपाः इनेगु नापं चचा प्याखंया छगू सीडी नं विमोचन जुइगु ग्वसाः दु ।
उकथं हे थौं यलय् नेपालभाषा मंकाः खलः यलया ग्वसालय् मंगलबजारं छगू तःजिगु र्याली पिकाइगु ज्याझ्वः दुसा ख्वपय् नं छगू सांस्कृतिक र्याली पिकयाः देय् चाःहिलीगु ज्याझ्वः दु ।
थुगुसी न्हूदँया लसताय् जूगु आपालं ज्याझ्वःया वक्तातय्सं आः च्वइगु न्हूगु संविधानय् नेवाः स्वायत्त राज्यया स्पष्ट उल्लेख जुइमाःगु माग याःगु दु ।
थुगुसी न्हूदँया लसताय् प्रधानमन्त्री माधव नेपालं नं वालुवाटारय् छगू तुच्चा ज्याझ्वः यानादीगु दु। थौं न्हिनसिया २ निसें ५ बजे तक उगु तुच्चा याइगु ग्वसाः दु ।
अथे हे राष्ट्रपति डा. रामवरण यादवं नं न्हूदँया लसताय् लाकाः कछलाथ्व दशमि (कार्तिक ११ गते) कुन्हु राष्ट्रपति निवासय् हे छगू तुच्चा सःतादीगु दु। वकुन्हु शंखधर साख्वाः न्हि खः। राष्ट्रपति यादवं थगुने नं थःगु निवासय् तुच्चा ज्याझ्वः सःतादीगु खः ।
