नेवाः दिवस कथं ज्यापु दिवस हने
सम्पादकजु
स्वनिगःया आदिवासी नेपाःमिपिनि छगू लसताया खँ खः ज्यापु दिवस । थ्व ज्यापु दिवस थ्वहे वइगु मंसिर २७ गते योमहि्र पुन्हि कुन्हु झःझः धायेक न्यायेकेगु निंतिं सरकारं सार्वजनिक बिदा नं बियातःगु दु । थ्व ज्यापु दिवसयात खालि ज्यापुतय्गु जक दिवस खः धकाः मेपिं जनजाति नेवाःतय्सं माने मयायेगु धइगु नेवालं नेवाःतय्त हेला यायेगु जुइ । थ्व ज्यापु दिवसयात झी सकलें स्वनिगः व स्वनिगलं पिने च्वनाच्वंपिंसं नं माने यानाः झीगु म्हसीका नेवाः झी नेवाः हे जुइ नेवाः नेवाः छप्पँ जुइ धइगु भावना दक्व जातियापिंसं क्यनेमाःगु दु ।
झीगु स्वनिगलय् पिनेयापिं खय् ब्रम्हू राई लिम्बु मधिसेतय्सं तकं वयाः थःगु जात्रा रहनसहन दिवस न्यायेका वयाच्वंगु दुसां झीसं आःतक नं छुं क्यने फयाच्वंगु मदु । खालि द्यः जात्रा करुणामय जात्रा जक खः । मेगु जात्रापात्रायात सरकारं मान्यता बियाः छुट्टि नं बियातःगु मदु ।
मेगु छुं नं क्यनेगु व ब्वयेगु ज्या न्ह्याकते सरकारं झीत लितमित्तु लिनाः ध्याकुनय् वांछ्वयातःगु दु । झीत स्यंकेगु निंतिं जात्रापात्रा व भ्वय् जक नकाः फुरुङ्ग याकातःगु दु । नेवाःत धाःसा खालि ल्वा जक ल्वानाच्वंगु दु । उकिं ज्यापु जातिया एकताया निंतिं सम्पूर्ण नेवाः जातियागु गौरव यायेबहगु व सरकारं नं ज्यापु दिवस धकाः नेवाःतय्त मान्यता बिउगु कथं झी नेवाः दक्व छप्पँ छधी जुयाः सकलें नेपाः गालय् च्वनाच्वंपिं नेवाःतय्सं थ्व न्हियात विजय जुलुस कथं नालाकासें दक्वसिनं ज्यापु दिवस धइगु नेवाःतय्गु दिवस खः धकाः झी दक्व न्ह्यचिले । थ्व दिनयात विशेष कथं लुमंकेबहगु दिन तायेकाः झःझः धायेक माने याये हानं नेवाःतय्सं मेगु नेवाः दिवस माने यायेगु निंतिं कुतः मयाये थ्वयात हे माने यानाः झी छप्पँ छधी जुयागुया परिचय बी नेवाः नेवाः हे जुयाः ।
तिर्थ मान महजर्न
बागबजार येँ
More Stories Like this
केन्द्रया अनुमति कयाः आर्थिक ज्या जुइ मखु प्वंकेमखंगु श्रद्धांजिल सुवर्ण शाक्य कि सुवर्णकेशरी ? लाःलाःथें भाःथकाये मजिल बांलाःगु सुझावयात सुभाय्
