स्वन्तिया मिं धनजन क्षति

छम्ह सित ल प्यम्ह घाःपाः ल करोडौं नोक्सान

येँ (सन्ध्या टाइम्स)/स्वन्ति नखः न्यायेकेत च्याकूगु पाल्चा व मुइकूगु बम पटाखाय् लानाः थीथी थासय् दुर्घटना जुयाः आपालं धन जनया क्षति जूगु दु। थुकी लानाः छम्ह मनूया ज्यान वंगु दुसा प्यम्ह घाःपाः जूगु दु ।

थौं सुथय् बारा मुइकूगु मिइ लानाः सप्तरीया मलेख गाविसय् छम्ह मिसा मचा सीगु दु। उकी लानाः खुदँ दुम्ह स्थानीय ममताकुमारी मेहता सीगु खः। वहे दुर्घटनाय् लानाः मचाया अबु छटकुन मेहता नापं मां सरितादेवी व निम्ह दाजुपिं दीपक कुमार व बबलु कुमार घाःपाः जूगु दु। उमित सगरमाथा अञ्चल अस्पतालय् वासः याकातःगु दु।
उखे म्हिगः बहनी स्वनिगःया ख्वपय् स्थानीय त्रिपुरासुन्दरीइ लक्ष्मीपुजा यानाः च्याकूगु पाल्चाया मिं नयाः छखा छेँ ध्वस्त जूगु दु। स्थानीय प्रद्युम्न कर्माचार्यया छेँय् बालं च्वनाच्वंपिं मनूतय्सं लक्ष्मीपुजा न्यायेकेत झ्यालय् च्याकूगु पाल्चाया मिं उगु दुर्घटना जूगु खः। उकी लानाः प्यतँजाःगु उगु छेँया च्वय्या नितँ बांमलाक क्षति जूगु दुसा उकी लानाः लखौं तकाया सम्पत्ति नष्ट जूगु दु ।

मि स्यायेत येँ, यल व ख्वपया प्यंगः न्यागः दमकल हयाः कुतः यायेमाःगु खः। थुकिया पाय्छि थुलि हे क्षति जुल धइगु विवरण धाःसा मवःनि ।

उकथं हे चीनलिसे स्वाःगु सिन्धुपाल्चोक जिल्लाया लिपिङ
बजारय् नं म्हिगः बहनी बारा मुइकूबलय् उकिया मिइ लानाः छक्वलं खुखा छेँ मिं नःगु दु ।

बहनी बारा मुइकूबलय् च्याःगु मिइ लानाः करिब छगू करोड तका बराबरया सम्पत्ति नष्ट जूगु अनुमान याःगु दु। उकी लानाः आपालं जिन्सी सामानया नापं सछिम्ह फै व दुगुचा नं म्वाःम्वाकं च्याःगु खः ।

करिब सत्याखा छेँ दुगु उगु बजारय् छक्वलं मि च्यायेवं तसकं आतंक ब्वलंगु खः। खुखा तक छेँ च्यायेवं मि मेथाय् न्यना मवनेमा धकाः उगु छेँया नापं स्वानाच्वंगु मेगु न्याखा छेँ स्थानीय मनूतय्सं हे थुना बिउगु खः ।

उगु मि स्यायेगु लागिं नेपाःया जनपद प्रहरी, सशस्त्र प्रहरी व चिनियाँ प्रहरी समेत वयाः कुतः यायेमाःगु खः। चान्हय् करिब ४ घन्टा तक याःगु कुतः लिपा तिनि उगु मि स्याये फुगु खः। क्षतिया ल्याःचाः पिकायेगु ज्या थौं सुथय् तकं जारी हे जुयाच्वंगु दनि ।

स्थानीय प्रशासनं स्वन्ति नखः न्यायेकेबलय् बारा पटाखा थेंज्याःगु ज्वलं मुइकेमते धकाः धुंवांधू इनाप याःसां नं मुइकेगु ज्या धाःसा दिउगु खने मदु। प्रशासनया धापूयात वेवास्ता यासें असावधानीपूर्वक बारा मुइकेगु ज्या याना जूगुलिं हे थज्याःगु दुर्घटना जूगु अनुमान याःगु दु ।