पर्व विदायात व्यवस्थित यायेगु खँय्

कार्तिक ३ गतेयात नं किजापुजा माने यानाः बिदा बीगु लाकि मबीगु धकाः वःगु विवाद समाधान यायेत सरकारं अन्ततः सार्वजनिक विदा घोषणा याना बिउगु दु। ३ गते कुन्हु किजापुजा माने यायेगु तयारी यानाच्वंपिं अधिकांश नेवाःतय्त ला थुकिं राहत हे बिउगु दु जुइमाः तर २ गते किजापुजा याइपिनि लागिं धाःसा थ्व छु निं छु जुइगु जुल। ३ गते नं सार्वजनिक बिदा बीमाल धइगु माग यासें प्रधानमन्त्रीयाथाय् डेलिगेशन वंगु पुचःलिसे खँ ल्हासें प्रधानमन्त्री माधव नेपालं नेपालय् बिदा यक्व जुल धइगु प्रतिक्रिया बियादीगु खः। वास्तवय् वय्कःया धापू गलत मखु। नेपालय् थीथी पर्व, जात्र, नखःचखः, दिवस आदिया नामय् यक्व हे बियातःगु दु। नेपाः छगू बहुसांस्कृतिक देय् जूगु कारणं थन च्वंपिं आपालं समुदायया आपालं नखःचखःया लागिं बिदा बीमाःगु बाध्यता नं दु। तर थथे फुक्क नखःया लागिं फुकसित बिदा बीबलय् उगु नखः हनेम्वाःपिंत धाःसा उकिं छुं हे लबः बी मखु। अःखतं सर्वसाधारण मनूतय् ज्यायात जक थुकिं प्रभावित याइ। उकिं यक्वसित बिदा बीमाःगु थ्व समस्या समाधान यायेगु खःसा बिदाया निश्चित दिन तोके यानाः थःत गबलय् यः अबलय् कायेगु याना बिउसा दकलय् बांलाःगु उपाय जुइ। थुकिं यानाः थःथःगु नखःबलय् सकस्यां बिदा काये खनीसा सरकारी ज्याय् नं पंगः वइ मखु। केवल राष्ट्रिय रुपं हनेमाःगु दिवसय् छन्हु निन्हु बाहेक मेबलय् सरकारी ज्याकू चाला हे च्वनी व जनताया ज्या नं रोक जुइ मखु। थथे जुइबलय् बिदाया सदुपयोग नं जुइ, नखःचखः नं याउँक हने खनी। न्हूगु व्यवस्थाय् राज्यपाखें पर्व विदायात थुकथं व्यवस्थित यायेमाःगु खनेदु ।

More Stories Like this