न्हूदँया लसताय् मचा ब्वाज्या

न्हूदँ नेसं ११३० क्यनीगु लसताय् दँय्दसं थें थुगुसी नं न्हू पुचः भिंद्यःत्वाः पाखें थौं सुथय मचा ब्वाज्या ज्याझ्वः जुल । नेपाल भाषा मंकाः खलः न्हूदँ समारोह समितिया नायः नापं सभासद तीर्थराम डंगोलं उगु मचा ब्वाज्या उलेज्या यानादीगु खः ।

येँया वसन्तपुरं न्ह्याःगु उगु मचा ब्वाज्या न्हू सतक ओमबाहाः यंगाः लगं क्वहिति जुयाः भिंद्यःत्वालय् थ्यंकाः क्वचाःगु खः । ब्वाज्या लिपा उगु कासाय् ब्वतिकयादीपिन्त लुखा सिरपाः नेपालभाषा मंकाः खलःया छ्याँज्ये नरेशवीर शाक्यं लःल्हानादिल । मिजं मचा व मिसा मचातय्त विस्कं विस्कं हे ब्वाज्या कासा याःगु खःसा उगु ज्याझ्वलय् न्हाप, ल्यू व लियांल्यू लाःपिन्त कन्हय् न्हूदँया लसताय् बसन्तपुलिइ जुइगु ज्याझ्वलय् सिरपाः लःल्हाइगु ग्वसाः खलकं जानकारी ब्यूगु दु ।

दँय्दसं यानावयाच्वंगु थुगु झिंस्वक्वःगु मचा ब्वाज्या खः ।

More Stories Like this