बजेट मवःसां धन्दा मदु !

खर्च याये मफयाः ल्यनाच्वंगु ध्यबां तलब नइगु

येँ (सन्ध्या टाइम्स)/संसद न्ह्याये मफयाः छुं महिना तक बजेट पारित मजूसां नं कर्मचारीतय्त तलब नकेत धाःसा समस्या मवइगु खँ सम्बन्धित अधिकारीतय्सं धाःगु दु।
सरकारी अधिकारीतय्सं धाः कथं सरकारयाके अझ छुं महिना तक खर्च यायेत गाक्क ध्यबा दनि ।

साउनं पारित जूगु पेश्की खर्च विधेयक कथं कार्तिक लिपा सरकारं छुं हे ध्यबा खर्च याये दइ मखु। गुकिं यानाः कर्मचारीतय्त तलब, भत्ता लगायत विकास निर्माणया लागिं खर्च मदइगु अनुमान जुयाच्वंगु खः। तर अर्थ मन्त्रालयया वरिष्ठ आर्थिक सल्लाहकार केशव आचार्यं धाःसा अज्याःगु स्थिति मदु धयादीगु दु ।

'खर्चया समय सीमा क्वःछिना तःगु मदु अथे जुयाः छुं महिना तक गुगुं नं कथं समस्या वइ मखु', वय्कलं धयादिल।
असार मसान्त तकया निंतिं न्ह्यब्वःगु स्वंगू खर्ब पेश्की बजेट मध्ये विधेयकपाखें सरकारयात झन्डै छगू अर्ब ध्यबा खर्च यायेत अधिकार बियातःगु दु। तर सरकारं आः तक उकिया बछि हे खर्च मयाःनि। वय्कःया कथं असोज मसान्त तक ३२ करोड जक खर्च जूगु दु। बजेट दुसां खर्च याये मफुगुलिं ल्यनाच्वंगु थ्व ध्यबां हे मेगु छुं महिना तलब धाने याये फइगु अधिकारीतय् दावी दु ।

थःके खर्च मजूगु ध्यबा दनिगु कारणं बजेट पारित मजूसां नं कार्तिक लिपा तकया लागिं ध्यबा दनि धकाः सरकार लय्तायाच्वंसां विपक्षी माओवादी समर्थित अर्थविद्तय्सं धाःसा सरकारया थ्व लसतायात हास्यास्पद धाःगु दु। उमिसं धाः कथं सरकारं ज्या याये मफुगु व माक्व विकास निर्माणय् खर्च याये मफुगु कारणं हे थ्व ध्यबा ल्यनाच्वंगु खः।
माओवादी निकट अर्थविद् डिल्लीराज खनालं धयादी, 'थम्हं ज्या याये मफयाः ल्यनाच्वंगु ध्यबा खनाः थःहे दंग जुइगु थेंज्याःगु लज्या मचाःगु खँ मेगु छु दइ ?'

थुकिं छुं ई राहत बिउसां यदि ताः ई तक नं बजेट पारित मजुल धाःसा संकट हानं अप्वया वइगु खँ नं वय्कलं कनादीगु दु ।