अबु-म्ह्याय् जानाः ब्वलंकूगु कचवं
नेकां सभापति गिरिजाप्रसाद कोइरालां तप्यंक आदेश बियाः थः म्ह्याय् सुजाता कोइरालायात उपप्रधानमन्त्री दयेके बिउगु घटनां यानाः कांग्रेस दुने तःधंगु ल्वापु पिथंगु दु। बिचाः व मूल्य मान्यतायात कयाः जुयाच्वंगु थ्व ल्वापु म्हीग झण्डै ल्हाः हे तयेमालीगु स्तर तक कुहां वन। यदि थ्व ल्वापु तच्वया हे वन धाःसा कन्हय् थुकिं छु मोड काइ धाये फुगु अवस्था मदु ।
खतुं कांग्रेस गबलें नं निश्चित विधान, नियम वा पद्धतिइ च्वनाः न्ह्यानाच्वंगु पार्टी मखु। प्रतिबन्धित काल व वयां लिपा नं तत्कालिन त्रिमूर्तिया मौखिक विधानं थ्व पार्टी सञ्चालित जुइगु खः। आः त्रिमूर्तिया निम्ह वरिष्ठ नेतात मदयेधुंकूसां नं थुकिया मौखिक विधान धाःसा लागू हे जुयाच्वंगु दनि। वहे कारणं पार्टी सभापति गिरिजाप्रसाद कोइरालां सुयाकें मन्यँसे थः म्ह्याय्यात उपप्रधानमन्त्री दयेके बिउगु खः ।
तर सभापति कोइरालां थ्व ज्या यायेगु झ्वलय् थःगु हे पार्टी दुने नं फय् मेकथं सनेधुंकूगु खँयात धाःसा वाःचायेकूगु खने मंत। छगू ला पार्टीइ न्हूपिं नेतातय् उदय जुजुं वयाच्वंगु दु। मेगु, वय्कःया थहां वनाच्वंगु उमेर व कुहां वनाच्वंगु स्वास्थ्यं नं भविष्यय् पार्टीया नेतृत्व कब्जा यायेगु धेंधेंबल्लाःयात मचायेक उर्जा बियाच्वंगु दु। थज्याःगु इलय् वय्कलं थः म्ह्याय्या लागिं गुगु ज्या यानादिल, थुकिं पार्टी दुने कलह पिकाइगु स्वाभाविक खः ।
न्ह्यागुसां थ्व प्रकरणं पार्टी दुने थः धुंकाः थःगु दं सुयात बियाथके धकाः चिन्तित जुयाच्वंम्ह सभापति कोइरालां अन्ततः थःहे म्ह्याय् थःया उत्तराधिकारी खः धकाः अप्रत्यक्ष रुपं घोषणा यानादीगु धाःसा पुष्टि जूगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
