संविधान च्वज्याया पंगः बारे सहलह

संविधानसभाया थीथी समितिइ पिहां वयाच्वंगु थीथी विवादं यानाः संविधान च्वयेगु ज्या न्ह्यःने वने मफयाच्वंगु विषययात कयाः तःधंगु राजनीतिक दलया नेतातय् दथुइ नकतिनि बैठक च्वंगु दु। सम्भवतः संविधान च्वयेगु ज्याय् वयाच्वंगु पंगःयात कयाः दलया नेतातय् दथुइ बैठक च्वंगु थ्वहे न्हापांखुसी जुइमाः। अझ संविधान निर्माण बारे जक खँ ल्हायेगु धकाः तःधंगु दलया शीर्ष नेतातय् दथुइ ला छक्वः हे बैठक मच्वंनि ।

राजनीतिक पार्टीतय् ध्यान थ्व इलय् संविधान निर्माणपाखे वनाच्वंगु मदु। उपिं अझ हे नं सत्ता समीकरण व राजनीतिक कचवनय् हे व्यस्त तिनि। थुकिं यानाः संविधानसभाया थीथी विषयगत समितिइ संविधानया बुँदायात कयाः क्वय्यापिं सभासद्तय् दथुइ जक वहस जुयाच्वंगु दु। थ्व सभासद्तय्सं थःगु पार्टीया लाइन मवयेकं अन छुं निर्णय बी फुगु अवस्था मदु, अले बी फइ नं मखु। तर पार्टीतय्सं धाःसा उमित अज्याःगु खँय् थःपिनि लाइन बीगु ज्या याये हे खनाच्वंगु मदु। थुकिं यानाः सम्पूर्ण संविधान च्वयेगु ज्या हे आः छगू कथं थाति थें जुयाच्वंगु दु। सभामुख सुभाष नेम्बाङं थाय्थासय् न्ववानाः जक मखु नेतातय् छेँय् छेँय् हे वनाः संविधान च्वयेगु ज्यापाखे ध्यान बिया बी माल धकाः इनाप यानाच्वंगु दु। तर वय्कःया आग्रह सुनां नं न्यनाच्वंगु दु। संविधान च्वयेगु जक मखु आः ला सदन चले याये मफुगु
कारणं यानाः देशय् न्हियान्हिथं यायेमाःगु ज्या तक नं याये फइगु अवस्था जुयाच्वंगु मदु। थज्याःगु इलय् संविधान च्वयेगु ज्याय् वयाच्वंगु पंगःयात कयाः नेतातय्सं याःगु सहलह धाथें नं सकारात्मक खः। थुकियात अझ न्ह्यःने न्ह्याका यंकेमाः ।

More Stories Like this