न्हूपिं गायकपिंत दान्यहिरा सिरपाः

येँ (सन्ध्या टाइम्स)/नेपालभाषा आकादमीया ग्वसालय् अशोक पार्टी पालेसय् म्हिगः जूगु छगू मुँज्याय् नेपालभाषा आकादमीया चान्सलर सत्यमोहन जोशीं थुगुसीया दान्यहिरा सिरपाः लःल्हानादिल। नापं उगु हे मुँज्याय् वय्कलं दान्यहिरा सिरपाःया दाता व बाखं च्वमि यज्ञरत्न धाख्वाःया बाखं मुना सफू 'त्यामजिगु सः' या विमोचन नं यानादिल ।

दँय्दसं साहित्य व संगीत विधायात पालंपाः बिया वयाच्वंगु थुगु सिरपाः थुगुसी न्हूपिं प्रतिभायात प्रोत्साहन यायेगु कथं युवा गायक सतिश महर्जन व युवा गायिका रत्नशोभा महर्जनयात दामासाही रुपं नीन्याद्वः तका व हनापौ देछाःगु खः ।

अथेहे थुगु हे मुँज्याय् जनसाहित्यय् संलग्न जुयाः व 'खराचा व सिंह' खण्डकाव्यया माध्यमं नेपालभाषा साहित्य छेँय्छेँय् थ्यंकेत ताः ईनिसें योगदान बिया झाःम्ह राजभाई जकःमियात मतिना चिं कथं हनापौ देछानाः सम्मानित याःगु खः ।

नेपालभाषा आकादमीया चान्सलर सत्यमोहन जोशीया नायःसुइ जूगु उगु मुँज्याय् वरिष्ठ गायक योगेश वैद्यं नेवाः संगीत उत्थान यायेगु खःसा पुलांगु संगीतयात आधुनिक पहिरन बियाः थकायेमाःगु व थुकिया लागि न्हूपिं कलाकारतय्त प्रोत्साहन व तिबः बियाः न्ह्यज्याकेमाःगु खँय् बः बिसें थुगुसीया दान्यहिरा सिरपाः थुकिया हे शुरुवात खः धयादिल। नेपालभाषा आकादमीया सदस्य-सचिव इन्द्र मालीं दान्यहिरा सिरपाःया म्हसीका बियादिसें न्हू प्रतिभापिंत सिरपाः बिउसा न्हूगु प्रवाह व जागरण वइ धइकथं थुगुसीया सिरपाः लःल्हायेगु निर्णय जूगु खँ कनादिल। अथेहे आकादमीया भाइस चान्सलर लक्ष्मण राजवंशीं नेपालभाषा त्यामजीगु भाय् जूगुलिं गनं सरकारं नं झीगु सः मन्यंगु खःला धासें साझा प्रकाशन धाइ तर अन झी मन्ह्यं उकिं झी नं न्ह्यंकेगु कुतः जुइमाल धयादिल ।

प्राध्यापक प्रेमशान्ति तुलाधरं विमोचित सफू बारे समिक्षात्मक टिप्पणी यानादीगु उगु ज्याझ्वलय् सिरपाःया दाता यज्ञरत्न धाख्वानं दान्यहिरा सिरपाःया अवधारणा व बाखंया बारे थःगु नुगःखँ प्वंकादिल ।

दाता यज्ञरत्न धाख्वानं थः मदयेधुंकूम्ह अबु दानरत्न धाख्वा व मदयेधुंकूम्ह तिरिमय्जु हिरादेवी धाख्वाःया नामं थुगु सिरपाः नीस्वनातःगु खः। ने.सं. ११२४ निसें साहित्य व संगीत विधायात पालंपाः बिया वयाच्वंगु थुगु सिरपाः थुगुसी संगीत विधाया लागि बिउगु खः। आः तक थुगु सिरपाः झिम्ह व्यक्तियात बीधुंकूगु दु। थगुने रजनी मिलायात नीन्याद्वः तकाया हःपाः सिरपाः बिउगु खः ।

More Stories Like this