नेतातय्त सुजाताया ख्याच्वः

सिंह व निधियात कोइरालां नापमलासे छ्वया हल

येँ (सन्ध्या टाइम्स)/सुजाता कोइरालायात उपप्रधानमन्त्री दयेकेवं कांग्रेसय् ब्वलंगु विवाद बारे खँ ल्हायेत सभापति गिरिजाप्रसाद कोइरालायात नापलाःवंपिं पार्टीया महामन्त्रीद्वय प्रकाशमान सिंह व विमलेन्द्र निधियात म्हिगः कोइरालां नाप हे मलासे लित छ्वया हःगु दु ।

पार्टीया बैठक च्वने न्ह्यः कोइरालालिसे सल्लाह याये धकाः वय्कःपिं वंगु खः। सूत्रं धाः कथं वय्कःपिंत नापमलासे लित छ्वयेधुंकाः कोइरालां लिक्कसं च्वंम्ह थः सचिवयात 'गणेशमान व महेन्द्रनारायण थेंज्याःपिं थुमि अबुपिंत ला ठेगान याना बिया धाःसा थ्व फुस्तातय्सं छु याइ?' धकाः प्रतिक्रिया बियादीगु खः ।

अनं अथें लिहां वःपिं प्रकाशमान व विमलेन्द्र निम्हेस्यां नं वयां लिपा च्वंगु पार्टीया केन्द्रीय बैठकय् कडा रुपं न्ववानादीगु खः ।

म्हिगः च्वंगु केन्द्रीय बैठकय् सुजाता कोइरालायात उपप्रधानमन्त्री नियुक्त याःगु एजेण्डा प्रवेश यासें संसदीय दलया नेता रामचन्द्र पौडेलं न्ववायेवं हे सुजाता थःगु मेचं जुरुक्क दनाः झण्डै पौडेलया गःतां हे ज्वनेत्यंगु खः। वय्कःयात मेपिंसं पनेमाःगु खः। पौडेलयात तथानाम ब्वः बिसें सुजातां 'जि चुनाव त्यानाः मन्त्री जुयाम्ह मखुसा छ नं ला चुनाव त्यानाः उपसभापति जूम्ह मखु नि। छंत सुनां उपसभापति दयेकल? नयागु द्यय्माय् फायेगु ला छं?' धकाः म्हुतु वाःगु खः ।

सुजातां पार्टीया उपसभापति, महामन्त्री, फुक्कसित थः अबुं मनोनित यानाः नेता दयेकूगु खः धासें आः थःत मनोनित याःबलय् जक छाय् मेपिंसं कपाः स्याके माल धकाः नं न्ह्यसः तयादीगु खः ।

लिसें वय्कलं थौं थःगु विरोध याःपिं फुकसित पार्टीया महाधिवेशनय् क्यना बीगु ख्याच्वः नं बियादीगु खः।
वय्कलं पार्टीया फुकसित थः हे अबुं नेता दयेकूगु खः धासें थौं उमिसं हे थः अबुया विरोध यात धकाः आक्रोश प्वंकूगु खः।
बैठकं आः सभापति कोइरालायात हे बैठकय् सःताः थुकिया बारे निर्णय यायेगु धकाः क्वःछिउगु दु। कोइराला विराटनगर झाःगु दु ।