हत्यारायात कारवाही जुइ ः प्रम

येँ -सन्ध्या टाइम्स)/स्यूचाटारया निम्ह ल्याय्म्हतय् हत्या याःपिंत कारवाही यायेगु प्रतिवद्धता प्रधानमन्त्री पुष्पकमल दाहाल प्रचण्डं प्वंकादीगु दु । थौं सुथय् हत्या काण्ड विरुद्ध आन्दोलन यानाच्वंगु नागरिक जन- संर्घष्ा आन्दोलन समितिया पदाधिकारीत लिसे खँ ल्हासें वय्कलं उगु प्रतिवद्धता प्वंकादीगु खः । थौंया वार्ताय् प्रधानमन्त्री व संर्घष्ा समितिया दथुइ गुंगू बुँदाया सहमति नं जूगु दु । सहमति कथं पीडित छेँजःयात झिगू लाख तका क्षतिपर्ूर्ति बीगु, छेँजःया छम्हेसित सरकारं जागिर नकेगु, आन्दोलनय् तोडफोड जूगु सवारी साधनयात क्षतिपर्ूर्ति बीगु, उच्च स्तरीय छानवीन आयोग दयेकाः हत्या बारे छानवीन यायेगु, घाःपाः जूपिंत वासः यायेगु व आयोगया सिफारिस कथं हत्याय् ल्हाः दुपिं ज्वनाः कारवाही यायेगु प्रतिवद्धता
सरकारं प्वंकूगु दु ।
उखे प्रधानमन्त्रीलिसे जूगु सम्झौता हत्या काण्डयात त्वपुइगु कुतः खः धासें कोटेश्वरया जनतां विरोध याःगु दु । रामहरीकृष्ण श्रेष्ठ हत्याकाण्ड बारे नं माओवादी अध्यक्ष प्रचण्डं उकथं हे सम्झौता याःगु तर सम्झौता कथं ज्या धाःसा मयाःगु द्वपं उमिसं बिउगु दु । उमिसं कोटेश्वर लागाय् चक्का जाम नं याना बिउगु दु ।