माओवादी भेला न्ह्याके मफुनि

येँ -सन्ध्या टाइम्स), माओवादी दुने ब्वलंगु विवादया कारणं यानाः म्हिगःनिसें न्ह्याइ धाःगु पार्टर्ीी राष्ट्रिय कार्यकर्ता भेला थौं न्हिनय् तकं न्ह्याये मफुनि । म्हिगः हे शुरु जुइमाःगु थ्व भेला थौं नं मजुइगु सम्भावना दुगु खँ सूत्रं धाःगु दु ।
म्हिगः न्ह्याये मफुगु थ्व भेला थौं न्हिनय् ३ बजे यायेगु कथं क्वःछिनातःगु खःसा थौं नं निगुलिं प्रतिवेदनयात छगू हे यायेगु कुतः जारी जुयाच्वंगुलिं भेला न्ह्याये मफयाच्वंगु खः ।
सूत्रं धाः कथं निगुलिं पुचलं छगू हे प्रतिवेदन दयेकेगु कुतः यानाच्वंसां छगू हे प्रतिवेदन दयेके फइगु सम्भावना धाःसा तसकं म्हो जक दु । छगू हे प्रतिवेदन दयेकेगु कुतः विफल जुसेंलि आः निगुलिं प्रतिवेदनयात राष्ट्रिय कार्यकर्ता भेलाय् हे प्रवेश याकेगु तयारी जुयाच्वंगु दु । राष्ट्रिय भेलाय् निगुलिं प्रतिवेदन
बारे बहस यानाः उकी मध्यय् छगू पारित याइगु ग्वसाः दु । सूत्रया कथं थौंया इलय् माओवादी अध्यक्ष प्रचण्डया प्रतिवेदन समय सापेक्ष जूगुलिं कार्यकर्तां उकिया हे पक्षय् मत बीगु सम्भावना अप्वः दु ।

नेपाःया वर्तमान स्थितिइ कांग्रेस लगायत प्रतिक्रियावादी शक्ति कमजोर मजूगु व मधेश लगायत देय्न्यंकं हे थीथी कथंया राजनीतिक शक्तिया चलखेल अप्वया वनाच्वंगुलिं आः हे जनगणतन्त्रय् वनेगु धइगु माओवादीया निंतिं प्रत्युत्पादक जुइगु खँ प्रचण्ड पक्षया नेतातय्सं धायेगु यानाच्वंगु दु । उमिगु धापू कथं यदि आः हे जनगणतन्त्रय् वनेगु कुतः यात धाःसा देशय् अराजक स्थिति ब्वलनाः गृहयुद्ध जुइ फइगु समेत तःधंगु खतरा दु ।
थौं सुथंनिसें निगुलिं प्रतिवेदनयात कयाः केन्द्रीय दुजःतय्सं तःगु न्ह्यसःया लिसः बीगु ज्या न्ह्यानाच्वंगु दु ।
वरिष्ठ नेता मोहन बैद्य -किरण) या प्रतिवेदनयात कयाः केन्द्रीय दुजःतय्सं तःगु न्ह्यसःया लिसः बीगु ज्या क्वचायेधुंकूगु दुसा आः अध्यक्ष प्रचण्डं थःत वःगु न्ह्यसःया लिसः बीगु ज्या न्ह्यानाच्वंगु दु ।
माओवादी अध्यक्षं लोकतान्त्रिक गणतन्त्रयात संस्थागत यानाः संविधान दयेकेगु खँ थःगु प्रतिवेदनय् दुथ्याकातःगु दुसा
वरिष्ठ नेता बैद्यं जनव्रि्रोह मार्फ जनगणतन्त्रय् हे वनेमाः धइगु लाइन थःगु प्रतिवेदनय् उल्लेख यानादीगु दु । भेलाय् ब्वति कायेत झिंनिसःम्ह कार्यकर्ता धाःसा खरिपाटीया भेला-स्थलय् मुना च्वनेधुंकूगु दु ।