सुजाताया खँय् कांग्रेसय् बबाल
कोइरालायाके स्पष्टीकरण कायेगु माग
येँ (सन्ध्या टाइम्स)/प्रधानमन्त्री माधव नेपालं परराष्ट्र मन्त्री सुजाता कोइरालायात उपप्रधानमन्त्री दयेकेवं निन्हु तक स्थगित जुयाच्वंगु नेपाली कांग्रेसया केन्द्रीय समितिया बैठक थौं च्वनेत्यंगु दु ।
थौंया बैठकय् राज्यया पुनर्संरचना सम्बन्धी पार्टीया अवधारणाय् सहलह यायेगु धाःसां नं सभापति गिरिजाप्रसाद कोइरालाया म्ह्याय् सुजाता कोइरालायात उपप्रधानमन्त्री दयेकेधुंकाः पार्टीइ खने दुगु विवादं बैठकया अप्वः ई काइगु खँ कांग्रेसया छम्ह केन्द्रीय दुजलं धयादीगु दु ।
पार्टीया संस्थागत निर्णय अःखः सुजातायात उपप्रधानमन्त्री दयेकेधुंकाः सरकार प्रतिया रणनीति बारे सहलह केन्द्रित जुइगु खँ कांग्रेसया प्रवक्ता अर्जुन नरसिंह केसीं धयादीगु दु।
न्हिनसिया २ ताः लिपा पार्टीया केन्द्रीय ज्याकू सानेपाय् च्वनीगु बैठकय् पार्टीया निर्णय अःखः सभापति कोइरालां यकःति रुपं यानादीगु निर्णययात कयाः नं सहलह जुइ धाःगु दु। सहलह लिपा थ्व बारे पार्टीया आधिकारिक धारणा वइगु खँ नं धाःगु दु। कोइरालाया हे दवाव लिपा प्रधानमन्त्री माधव नेपालं सुजातायात उपप्रधानमन्त्री दयेकूगु खः ।
कोइरालां थः म्ह्याय् सुजातायात उपप्रधानमन्त्री दयेकेधुंकाः कांग्रेसया आपालं पदाधिकारी व प्रभावशाली केन्द्रीय दुजःतय्सं तच्वकं विरोध याना वयाच्वंगु दु ।
थौंया केन्द्रीय समितिया बैठकय् संस्थागत निर्णय माने मयाःम्ह सभापति गिरिजाप्रसाद कोइरालायाके स्पष्टीकरण कायेमाः वा म्वाः धइगु बारे समेत सहलह जुइगु खँ नं धाःगु दु। अथे हे बैठकं पार्टीया आधिकारिक निर्णय बिना प्रधानमन्त्रीं याःगु ज्यायात कयाः नं प्रधानमन्त्रीया दृष्टिकोण छु खः धइगु बारे सहलह जुइ धाःगु दु ।
पार्टी स्रोतं धाः कथं कांग्रेसया इतिहासय् दकलय् न्हापां केन्द्रीय नेतातय्सं प्रत्यक्ष रुपं सभापति कोइरालाया विरुद्ध खुल्ला रुपं हे विरोधय् कुहां वःगु दु ।
उखे कांग्रेसय् कोइरालाया बारे विवाद जुयाच्वंगु हे इलय् स्वयम् कोइराला धाःसा थौं विराटनगर झायेत्यंगु दु। कांग्रेस दुने विवाद ब्वलन धाःसा वा थःत मछिंगु अवस्था ब्वलन धाःसा खुरुक्क विराटनगर वना छ्वयेगु वय्कःया पुलांगु बानी खः। थुपालय् नं विराटनगरय् च्वनाः पार्टीया विवाद बारे वय्कलं छु धयादी थें धकाः सकस्यां ध्यान बियाः पियाच्वंगु दु ।
वय्कलं विराटनगरय् मोरङ कांग्रेस ज्याकुथी तयेत्यंगु वीपी कोइरालाया शालिक नं उलेज्या यानादीगु ज्याझ्वः दुसा कांग्रेस नेत्री नोना कोइरालाया शालिक नं उलेज्या यानादीगु ज्याझ्वः दु ।
