गैर आवासीय नेपाःमितय् सम्मेलन

विश्वया थीथी देशय् च्वनाच्वंपिं नेपाःमितय्गु प्यक्वःगु अन्तर्राष्ट्रिय सम्मेलन म्हिगःनिसें नेपालय् शुरु जुल। 'नेपाःमिया लागिं नेपाःमि' धइगु नारा बियाः न्ह्याःगु थ्व सम्मेलनपाखें देय्या लागिं छुं भिंगु ज्या जुइ धइगु आशा थ्व इलय् सकस्यां यानाच्वंगु दु ।

थ्व स्वयां न्ह्यः जूगु स्वंगू तकया सम्मेलनपाखें थ्व संस्थां नेपालय् गुगु कथंया ज्या याये धकाः ग्वसाः दयेकूगु खः, व आः तक पूवंगु मदुनि। थ्वं खास यानाः नेपालय् तःधंगु मात्राय् लगानी यायेगु मू ग्वसाः दयेकूगु खःसां आः तक करिब झिगू अर्ब ति जक लगानी यायेधुंकूगु दु। गैर आवासीय नेपाली संघया क्षमता कथं थ्व तसकं म्हो खः। खतुं थौं नेपालय् गुगु कथंया राजनीतिक मौहाल दु अन गैर आवासीय नेपाःमितय्सं मग्यासे लगानी यायेगु वातावरण नं मदु। नेपाःया सुं नं सरकारं लगानी सुरक्षित याना बी धकाः बीगु आश्वासनयात पत्याः यायेगु थाय् नं मदुनि। खास यानाः दछिया दुने हे सरकारत हिला हिलाच्वनीगु कारणं यानाः। विश्वया आपालं देशय् नेपाःमितय्सं उद्योग, व्यापार व्यवसायय् ततःधंगु उपलब्धी चूलाकाच्वंगु सफलताया बाखंत झीसं न्यनाच्वना। यदि उमिसं अन चूलाकूगु सफलतायात थन लागू जक खःसां नं झीसं लगानीया लागिं विदेशीतय् ख्वाः स्वयाच्वने माःगु बाध्यता यक्व हद तक ज्यनी। थुखेपाखे सरकारं कुतः याये हे माः। तर एनआरएनतय्सं नं न्ह्याबलें नेपाः, नेपाःमि व नेपाली सरकारया आलोचना यानाः जिम्मेवारीं लिचिलेगु ज्या जक यानाच्वनेगु नं पाय्छि धाःसा मखु। थःगु ढंगं यायेफुगु ज्या न्ह्याकां तुं वनेगु कुतः नं जुइमाः। न्ह्यागुसां एनआरएन नेपाःया छगू भलसाया अंग जुइधुंकूगु दु ।

More Stories Like this