स्वन्ति नखः झ्वःलिकं हनेत इनाप
थीथी नेवाः खलः पुचःतय्सं पञ्चांग निर्णायक समितिं स्वन्ति नखःया तिथि स्यंकाः अःखः क्वछीउगु खँया विरोध यासें थुकीयात झ्वःलिकं हनेत इनाप याःगु दु ।
नेवाःतय् राष्ट्रिय संगठन नेवाः देय् दबू पाखें सोमवाः येँया रिपोटर्स क्लबय् छगू पत्रकार सम्मेलन यानाः कार्तिक १ गते लक्ष्मीपुजा, २ गते नेपाल संवत्या न्हूदँ व म्हपुजा व ३ गते किजापुजा यायेत सकसित इनाप याःगु दु ।
पत्रकार सम्मेलनय् न्ववानादिसें देय् दबूया नायः नरेश ताम्राकारं पञ्चांग निर्णाय समितिं नरक चतुर्दशी कुन्हु लक्ष्मी पुजा धकाः भ्रम ब्वलंकेत स्वःगु द्वपं बियादिल । वयेकलं कार्तिक ३ गते किजा पुजा कुन्हु सार्वजनिक विदा बीत नं माग यानादिल ।
थ्वस्वयां न्ह्यः नेपालभाषा मंकाः खलःया ग्वसालय् जूगु छगू वृहत भेलाय् येँ, यल, ख्वप व मेमेगु लागाया समासेवी, बुद्धिजीवी, भाषिक, जातीय व धार्मिक संघसंस्था, जनबहाः, स्वयम्भू व विजेश्वरीया गुर्जु प्रतिनिधितय्सं पञ्चांग समितिया निर्णय माने मयायेगु निर्णय याःगु खः ।
उगु भेलां नं सकसितं थःगु मौलिक पर्व झ्वःलिकं न्यायेकेत इनाप याःगु दु । अथेहे सरकारयात कार्तिक ३ गते किजा पुजा कुन्हु सार्वजनिक विदा बीत नं माग याःगु दु ।
अथेहे नेवाः जागरण मञ्च, नेपाल लोकतान्त्रिक नेवाः संघ लगायत संघ संस्थातय्सं नं स्वन्ति नखः कार्तिक १ निसें ३ गते तक झ्वःलिं हे हनेगु निर्णय यासें कार्तिक ३ गते किजा पुजा कुन्हु सार्वजनिक बिदा बीत माग याःगु दु ।
More Stories Like this
कन्याम इलामय् नेपालभाषा कक्षा न्ह्यात धिमे बाजं व भाषा प्रशिक्षण ज्याझ्वः क्वचाल थुर्पुय् स्वक्वःगु लाखे प्याखँ धेधेबल्ला ओखलढुंगाय् नेपालभाषा कक्षा क्वचाल नेवाः देय् दबू ओखलढुंगा तदर्थ समिति स्वन
