विचार, अभिब्यक्ति व चेतावनी

कृष्ण प्रजापति

मोहनि न्ह्यः तक मोहनि न्ह्यः हे सहमतीया आधारय् राजनीतिक निकास मालेगु धाःगु खः। तःधंगु पार्टीया तःधंगु स्वार्थ सुलाच्वंगुलिं अबलय् सहमती जुइ मफुत। आः स्वन्ति न्ह्यः उकथं हे राजनीतिक सहमती यायेगु मखुसा आन्दोलन वा बिद्रोहया लँपुइ वनेगु बिचार, अभिब्यक्ति व चेतावनीत वयाच्वंगु दु। तर देशया तःधंगु पार्टीया तःधंपिं नेतातय्गु थुगु विचार अभिब्यक्ति व चेतावनी नं आः पत्याः याये थाकुयाच्वंगु दु। छाय् धाःसा मोहनि न्ह्यः नं आः थें हे सहमती हयेगु व सहमती मजुल धाःसा जनबिद्रोह यायेगु धकाः माओवादीं ख्याच्वः बिउगु खः। तर उगु जनबिद्रोहया ख्याच्वः वल वल फसिक्वाः जुयाः फुयावन। आः नं स्वन्ति लिपा राजनीतिक गतिरोध अन्त्यया लागिं सहमति जुइगु खः कि राजनीतिक जनबिद्रोह जुइगु खः राजनीतिक बृत्तय् चर्चाया विषय जुयाच्वंगु दु। मोहनि न्ह्यः सहमति मजुल धाःसा जनबिद्रोह यायेगु धकाः ख्याच्वः बिउगु खः। तर अबलय् न सहमती जुल न त जनबिद्रोह हे जुइफत। उकथं मोहनि न्ह्यः बिउगु ख्याच्वः अथें फासांफुसुं जुयाः फुगुलिं आः स्वन्ति न्ह्यः सहमती यायेगु व सहमती मजुल धाःसा जनबिद्रोह यायेगु धकाः बियाच्वंगु ख्याच्वः नं दम मदुगु बिचार, अभिब्यक्ति व चेतावनी जकं जुइगु अनुमान शुरु जुइधुंकूगु दु ।

झिंनिदँ तक जंगलय् च्वनाः जनयुद्ध यानाः सत्ताय् थ्यंकागु दावी यानाच्वंपिं राजनीतिक नेतातय्गु सहमती व आन्दोलनया ख्याच्वः न्यँन्यं हे राजनीतिक नेता, कार्यकर्ता व सर्वसाधारण नेपाली जनता तकं वाक्कदिक्क जुजुं वनाच्वंगु दु। सहमतीया खँ ल्हायेगु तर सहमतीया लागिं धाःसा छुं नं पहल मयायेगु गुलि पाय्छिगु खँ खः? जन बिद्रोहया खँ राजनीतिक नेतातय्गु विचार, अभिब्यक्ति व चेतावनीइ जक सीमित जुयाच्वंगुलिं यानाः नं जनता थौं वाक्क दिक्क जुयाच्वंगु खः। यदि जनबिद्रोह हे जुल धाःसा नेपाली जनताया राजनीतिक स्तर थहां वया उमित छगू ल्याखं राजनीतिक चेतना अभिबृद्धि जुयाः फाइदा हे जुइगु खइ। स्वन्ति न्ह्यः हे सहमतीया खँ ल्हानाच्वंगु हे इलय् नेकपा (माओवादी)या अध्यक्ष पुष्पकमल दाहाल प्रचण्ड चीन भ्रमणय् झाःगु दु। थथे शीर्ष नेता हे विदेश भ्रमणय् वनाच्वंगुलिं नं राजनीतिक सहमती जुइगु खँय् शंका जुइधुंकूगु दु। अथे जुयाः नं आः स्वन्ति धुंकाः छु कथं जनबिद्रोह याइगु खः व नं स्वये ल्यं हे दनि। नेपाली जनतायात खालि आश्वासन हे जक बियाः थथे याना बी अथे याना बी धकाः रनभुल्ल याना तयेगु निंतिं जक थज्याःगु बिचाः बीगु उचित मखु। नेपाली जनतां राहतया आशा यानाच्वंगु इलय् राजनीतिक गतिरोध जुयाच्वंगु बांलाःगु खँ मखु ।

माओवादीं सदनय् संकल्प प्रस्ताव दर्ता यानातःगु दु। थथे संकल्प प्रस्ताव दर्ता यानाः माओवादीं थीथी कथंया स्वंगू चाल म्हितेत स्वयाच्वंगु खनेदु। आः ला माओवादीं सरकारया नाडी जक ज्वंगु खः। वयागु क्षमता, योग्यता व असफलता सीके धुंकाः ला माओवादीं अवश्य नं सरकारया राजीनामा फ्वन निति। अले माओवादीया पुलांगु हे रोडम्याप कथं राष्ट्रपतिया असंवैधिनिक कदम भिंकेगु खँ जक ल्याइमखु कि राष्ट्रपतिया राजीनामा नं फ्वनेगु यायेफु। थथे राजनीतिक बृत्तय् खनेदुगु स्वार्थी ल्वय्या इलय् हे वासः मयात धाःसा समाजयात हे स्वार्थी व भ्रष्ट याना यंकेफु। सत्ताय् थ्यंकेगु हे जक स्वार्थ फुक्कं राजनीतिक पार्टीयाके ब्वलनाच्वंगु व जनताया सेवाया भावनां राजनीति याइपिं खने मदयाच्वंगुलिं हे नं थौं जनतां राहतया महसुस याये मफयाच्वंगु खः। विषयबस्तुइ दख्खल जुइ मफयाच्वंपिं गुलिं राजनीतिक पार्टीतय्सं नेपाली जनतायात प्रयोग याना स्वयेगु जक यानाच्वंगु दु। छगू ल्याखं माओवादी पुँजीवादी गणतन्त्रय् फँसे जुजुं वनाच्वंगुलिं नं थौं समस्या समाधानया छुं नं उपाय लुइ मफयाच्वंगु खः। रंगीन मिखा दुम्ह ध्वंचां सकसितं रंगीन हे खनी थें फुक्कं राजनीतिक पार्टीयात माओवादीं थःपिं थें हे भ्रष्ट, पदलोलुप व अराजकतय् हुल हे खंकाच्वंगु दु। वास्तविकता धाःसा थथे जुइ फइ मखु।
सामन्तवादया विरोध याइपिं मनूत थौं सामन्ती शासकत स्वयां स्वार्थी व विलाशी जुजुं वनाच्वंगु दु। थ्व ल्याखं श्रीपेच मदुपिं जुजुपिनि जन्म जुयाच्वंगु दु। आखिर तःमिपिं, पुलांपिं सामन्त व सम्भ्रान्त मनूतय्गु निंतिं जक देशय् गणतन्त्र वःगु खःसा परिवर्तनया छुं अर्थ हे दइ मखु। सर्वसाधारण जनतायात तकं परिवर्तनया महसुस याकेगु खःसा हे जक देशय् वःगु हिउपाः नं सकारात्मक रुपं कायेफइ। राजनीतिक पार्टी व राजनीतिक पार्टीया वर्गीय संगठनतय्सं सदां थःपिनि राजनीतिक स्वार्थया लागिं जक आन्दोलन यायेगु स्वयां जनतायात सचेत यायेगु ज्याय् ई फ्यायेमाःगु खः। राष्ट्रियता व प्रजातन्त्रया लागिं उमित सचेत व संगठित यायेगु ज्याय् अप्वः ई बीमाःगु खः। तर थौं अथे जुयाच्वंगु मदु। सचेत जनतां हे जक समाजयात परिवर्तन याये फइगुलिं जनतायात हे सचेत यायेमाः। तर सचेत जनतां हे थःपिनि पदलोलुप व स्वार्थी प्रबृत्ति सीकी धकाः नेपाली जनतायात शिक्षित व संगठित यायेगु थेंज्याःगु थाकुगु ज्याय् म्हो जक राजनीतिक पार्टीया ध्यान वंगु दु। राजनीतिक नेतातय्गु विचार, अभिब्यक्ति व चेतावनी नं थज्याःगु हे राष्ट्रिय हीत जनताया हित व बहुमत सर्वहारा वर्गया स्वार्थ अनुरुप जुया बिल धाःसा याकनं देश विकास याये फइ ।

बजेट सदनय् प्रस्तुत जूगु स्वला लिपा नं सदन हे चले याये मफुगुलिं आर्थिक वर्ष २०६६/६७ या बजेट पारित याये मफयेवं सरकार इतिमिति कनाच्वंगु दु। थ्व इलय् लाक्क हे माओवादीं साझा संकल्प प्रस्ताव हयाः एमाले व कांग्रेसयात झुके यायेगु कुतः जुयाच्वंगु दुसा माओवादीया उगु संकल्प प्रस्तावयात माने यायेगु खःसा थःपिं सरकारय् च्वनागुया अर्थ हे मदइगु सीकाः सचेत नं जुयाच्वंगु दु। अज्याःगु थीथी समस्याया समाधान यायेगु निंतिं हे थौं राजनीतिक पार्टीतय् दथुइ सहमती जुइमाःगु खः। तर सहमती व सहकार्य दुने नं राजनीतिक स्वार्थ सुलाच्वंगुलिं थौं झीगु देशय् राजनीतिक वातावरण अन लाः थन लाः मदया वनाच्वंगु दु। थज्याःगु इलय् नं राजनीतिक नेतातय्सं गम्भीर जुयाः समस्या समाधानया लँपुइ वने मफुत धाःसा कन्हय् वनाः झन जक झीगु देशय् अस्थिर राजनीतिक स्थिति कायम हे जुयाच्वनेफु। अथे जुयाः नं झीगु भविष्यया लागिं जनता हे सचेत व संगठित जुयाः ज्या यायेमाःगु स्थिति वयाच्वंगु दु ।

More Stories Like this