अयोग्य धाःपिं छापामारतय् भविष्य

देय्या थीथी शिविरय् च्वनाच्वंपिं माओवादी छापामारत मध्ये अयोग्य धकाः अलग्ग तःपिं छापामारतय्त आः शिविरं चीकाः मेथाय् तयेगु प्रक्रिया शुरु जूगु दु। माओवादीलिसे हे सल्लाह यानाः सरकार व राष्ट्र संघीय मिशन अनमिनं अयोग्य धकाः छुटे याःपिं छापामारतय्त मेथाय् तयेयंकेगु ज्या याःगु खः। तर सरकारं यायेत्यंगु थ्व ज्यापाखें अयोग्य ठहर जूपिं छापामार व उमि पासापिं धाःसा सन्तुष्ट जुयाच्वंगु दु। आः नं अनमिनया प्रतिनिधितय्सं अलग्ग तये न्ह्यः उपिंलिसे सहलह व संवादया ज्या न्ह्याकाच्वंगु दनि ।

माओवादी जनयुद्धया इलय् ताः ई तक बन्दुक ज्वनाः सैनिक तालिम कायेधुंकूपिं जक मखु तःक्वःमछि युद्धय् तकं ल्वायेधुंकूपिं जूगुलिं मानसिक रुपं थुमित सेना जुइत अयोग्य धायेगु अवस्था मदु। थुपिं गुलिं उमेर मगाःगुलिं (आः ला गुलिसियां गाये नं धुंकूगु दयेमाः), गुलिं शारीरिक बनौट मिले मजूगुलिं जक सेना जुइत लायक मजूपिं खः। अथे खःसां थुपिं पूर्ण रुपं सेनाया तालिम कायेधुंकूपिं व युद्धय् नं सरिक जुइधुंकूगु कारणं थुमिके नेपाल सेनाया जवानतय्के स्वयां नं अप्वः सैन्य अभ्यास दु। छुं जुयाः थुपिं कन्हय् अलपत्र जुइगु अवस्था थ्यन धाःसा थुमिसं न्हापा छापामार जुयागु इलय् गुगु सीप व कला सयेकातःगु खः वहे कलायात छ्यलाः म्वायेगु पलाः न्ह्याकेफु गुगु देश व समाजया लागिं अतिकं घातक जुइगु निश्चित दु। उकिसनं थौंकन्हय् माओवादीपाखें हे छुटे जुया वंपिं आपालं पुचःतय्सं हानं सशस्त्र संघर्ष न्ह्याका हयाच्वंगु दु। थन अयोग्य धाःपिं छापामारत अन वनाः सक्रिय जुइगु नं उतिकं हे सम्भावना दु। उकिं सरकार व स्वयम् माओवादीं नं थ्व पक्षयात गम्भीर जुयाः बिचाः यायेमाः ।

More Stories Like this